Нурлатта "Татарстан - туган йортыбыз” республика этномәдәни фестиваленең зона этабы уза
Халыклар дуслыгы йорты сәхнәсендә Аксубай, Алексеевск, Яңа Чишмә, Чистай, Спас һәм Нурлат районнары коллективлары һәм башкаручылары үзләренең иҗатларын күрсәтте.
Бу көнне кунакчыл Нурлат җирендә 450ләп катнашучы җыелды, аларның һәркайсы тамашачыларны һәм жюрины үз таланты белән таң калдырды. Иң күп санлы делегация Нурлат районыннан иде, алар тамашачыларга 30га якын иҗади номер тәкъдим итте.
Фестивальдә катнашучыларны Нурлат районы Башкарма комитеты җитәкчесенең социаль мәсьәләләр буенча урынбасары вазыйфаларын башкаручы Әлфия Галәүтдинова һәм сайлап алу комиссиясе рәисе, Татарстан Республикасының атказанган артисты Азат Зарипов сәламләде.
"Без сезне Нурлат җирендә сәламләвебезгә бик шат. Бүген барыбызны да мәдәният, сәнгать һәм гореф-гадәтләр даирәсенә берләштергән матур бәйрәм уза. Безнең төбәктә яшәүче халыкларның күптөрлелеген күрү мөмкинлегебез бар. Этнофестиваль өлкән һәм үсеп килүче буынны тоташтыручы күпер булып хезмәт итә: "Көмеш чор” вәкилләре яшьләргә бәһасез халык мирасын тапшыра", - дип ассызыклады Әлфия Сәлиховна.
Бәйрәм рухын сәхнәдән Халыклар Дуслыгы Йорты директоры Галина Терентьева адресына туган көне белән котлау тулыландырды.
Фестиваль кысаларында катнашучылар өч номинациядә көч сынашты: «Вокал», «Хореография» һәм «Инструменталь музыка». Чыгышлардан соң ук барлык артистларга да сайлап алу турында катнашучы дипломнары тапшырылды. Компетентлы жюри тарафыннан иҗади номерлары югары бәяләнгән коллективлар һәм башкаручылар Казанда Халыклар бердәмлеге көнендә узачак традицион гала-концертта чыгыш ясау хокукына ия булачак.
Оештыручылар билгеләп үткәнчә, чара Татарстанның күпмилләтле мәдәниятен саклауга һәм популярлаштыруга юнәлдерелгән. Проект «Гаилә» илкүләм проектының, аерым алганда, «Гаилә кыйммәтләре һәм мәдәният инфраструктурасы» федераль проектының максатларына ирешүгә ярдәм итә, гаилә һәм иҗтимагый элемтәләрне ныгыту өчен нигез буларак мәдәниятнең һәм традицияләрнең ролен ассызыклый.