Нурлат үзәк район хастаханәсе баш табибы медицина өлкәсе ветераннарына язылу бүләк итте
Нурлат үзәк район хастаханәсе баш табибы Айдар Сәгъдиев «Район газетасын – туган телдә» акциясенә кушылды һәм медицина ветераннарына 2026 елның беренче яртыеллыгына район газетасына язылуны оештырды.
Халыкара өлкәннәр көненә багышланган әбунә сертификатларын тапшыру тантаналы шартларда узды.
"Ветераннар өчен күңелгә ятышлы бәйрәм программасы әзерләдек: район хастаханәсендә эшләгән еллары турында истәлекле видеороликлар, интерактивлар, бәйрәм өстәле янында җылы хатирәләр уянды. Кичәнең аерым бер минутын без инде безнең белән булмаган хезмәттәшләребез истәлегенә багышладык, - аларның хезмәте безнең хастаханә тарихында мәңгегә калачак", - диде баш табиб. Биредә ул Флүрә Насыйбуллинаны котлады, аңа 28 сентябрьдә 90 яшь тулды. Флүрә Сәет кызы озак еллар гинекология бүлегендә эшләгән, бөтен гомерен яраткан һөнәренә багышлаган.
«Көмеш» волонтерларга да аерым рәхмәт сүзләре әйтелде. “Алар лаеклы ялда булуларына карамастан игелек өләшүчеләр сафында калалар: тегәләр, бәйлиләр, гуманитар ярдәм җыялар һәм СВО сугышчыларына ярдәм итәләр", – диделәр очрашуда. Изге теләкләр һәм бүләкләр белән бергә һәркайсына үз телендә район газетасына язылуга әбунә квитанциясе тапшырылды.
Исегезгә төшерәбез, «Район газетасын – туган телдә» традицион акциясе һәр язылу кампаниясендә үткәрелә. Бу юлы да аны район Башлыгы Дамир Ишкинеев җибәрде. Анда һәркем катнаша ала: район газетасына язылу бүләк итү – кемгәдер ярты ел буе яраткан газетасын алырга һәм райондагы барлык вакыйгалардан хәбәрдар булып калырга мөмкинлек бирү ул.