ЯҢА ЕЛ АЛДЫ МӘШӘКАТЬЛӘРЕ БАШЛАНДЫ

–Урамда җылы һава торса да, Яңа ел үзвакытында килеп җитәсен онытмыйк,–дип башлады сүзен Яңа елга әзерлек мәсьәләләренә багышланган киңәшмәдә район башлыгы вазифаларын Флюра Ногманова. Нурлат әлеге бәйрәмгә әзерлек һәм аны масштаблы үткәрү буенча тәҗрибәсен быел тагы да яңа бизәкләр белән баетмакчы. Болар хакында җентекле аңлатманы Нурлат муниципаль районы башкарма комитеты җитәкчесенең социаль-мәдәни мәсьәләләр буенча урынбасары Рәмзия Сингатуллина җиткерде. Ул сүзен әлеге уңайдан район башкарма комитеты кабул иткән карар белән таныштырудан башлады, оештыру комитеты составын һәм чаралар планын бәян итте. Быел да шәһәр оешма –предприятиеләрнең фасадын иң яхшы бизәүгә, шәһәр микрорайоннарында чыршыларны бизәүгә, шәхси йорт һәм балконнарны бизәүгә конкурслар игълан ителәчәк. Авыл җирлекләрендә социаль-мәдәни объектларны иң яхшы бизәүгә конкурс уздырылачак. Конкурслар, чыршы бәйрәмнәре, күңел ачулар программалары 13 гыйнварга кадәр сузылачак. Ә шәһәрне бизәүдә, мәгариф учреждениеләренә шефлык итүдә җаваплыларны шәһәр башкарма комитеты җитәкчесе Рәмис Кәримов төгәлләштерде. Конкурста җиңүчеләр өчен быел да мулдан бүләкләр каралган. Башка еллардан аермалы буларак, быел бәйрәмгә әзерлек чараларыннан баш тартучыларга да җавап тотарга туры киләчәк. Бусы хакында район башлыгы башкаручы Флюра Ногманова басым ясап искәртте.