Подъездда тарттыңмы – штраф түлә

15 ноябрьдән җәмәгать урыннарында тәмәке тарткан өчен штраф салырга мөмкиннәр. Бөтендөнья сәламәтлек саклау оешмасының рамкалы конвенциясендәге таләпләрнең берсе – аерым урыннарда тәмәке тартуны тыю. 2008 елда бу конвенцияне имзалап, Россия әлеге конвенция кысаларында каралган чаралар белән килешүен белдерде. 

Быелның 1 июненнән “Гражданнарның сәламәтлеген тирә-яктагы тәмәке төтененнән һәм тәмәке куллануның нәтиҗәләреннән саклау турында”гы закон үз көченә керде. Ә 15 ноябрьдән җәмәгать транспортында, вокзалларда, мәгариф, социаль учреждениеләрдә, балалар мәйданчыкларында, подъездларда, шулай ук эш урыннарында тарткан өчен штраф салырга мөмкиннәр. Законның үтәлешен исә полиция контрольдә тотачак.

– Мисал өчен, аерым территорияләрдә, биналарда һәм объектларда тәмәке тартуны тыю турындагы законны бозган өчен 500 сумнан алып 1,5 мең сумга кадәр штраф салына. Балалар мәйданчыкларында тартучыларга исә 2-3 мең сумлык штрафлар яный, – диде Россия МВДсының Нурлат районы буенча полиция бүлеге начальнигы урынбасары Илдус Тәмаев. Шулай ук тәмәке тарту тыелган территория, бина-объектлар турында  искәртүче билгеләр таләпләренә игътибар итмәүчеләргә дә штрафлар каралган. Моннан тыш, тәмәке һәм тәмәке әйберләрен рекламалаган, аны сатуны стимуллаштырган һәм сату тәртибен бозган, балигъ булмаганнарга тәмәке саткан өчен дә штрафлар бар. Әмма штрафлар һәм тыюлар гына җәмгыятьтә тәмәке тарту проблемасын хәл итәр микән соң?

Андрей Николаев, дәүләт хезмәткәре:

– Күзгә ташланырлык тартучылар азаер да, мөгаен, әмма тәмәке көйрәтүчеләрнең кимүе икеле. Күптән чаралар күрергә вакыт инде. Бу бит иң беренче чиратта тартучылар файдасына гына булачак. 

Фәрит Камалов, УТТ профкомы рәисе:

– Безнең барлык дүрт автоколоннада һәм остаханәләрдә дә тәмәке тарту өчен махсус урыннар билгеләнгән. Моннан тыш, тәмәке тарту тыелган урыннарга тыючы билгеләр куелган. Әлегә кагыйдә бозуларның булганы юк.