Нурлат районында агросәнәгать комплексының актуаль мәсьәләләре турында фикер алыштылар
Чарада авыл хуҗалыгы предприятиеләре җитәкчеләре, авыл җирлекләре башлыклары, фермерлар һәм умартачылар катнашты.
Нурлат районы Советының зур залында агросәнәгать комплексының актуаль мәсьәләләренә багышланган семинар-киңәшмә узды.
Авыл хуҗалыгы һәм азык-төлек идарәсе башлыгы Ирек Шәрәфетдинов терлекчелек һәм иген үстерүдәге төп күрсәткечләр, фермер хуҗалыкларына ярдәм чаралары белән таныштырды, район умартачыларына кагылышлы мәсьәләләргә тукталды. Ирек Минсалихович билгеләп үткәнчә, бүгенге көндә районда 254 умарталык теркәлгән. Ул аграрийларны, умарталарны агулау куркынычын киметү өчен, кырларны эшкәрткәндә пестицидлар куллану регламентларын төгәл үтәргә өндәде.
«АПК сыйфатын бәяләү үзәге» ФДБУ директоры урынбасары Идрис Гатин 2025 елның 1 сентябренә кадәр барлык умарталыклар өчен ветеринария-санитария паспортларын рәсмиләштерү кирәклегенә басым ясады. Документлар булмау продукцияне сатуда һәм бал кортларын күчерүдә чикләүләргә китерергә мөмкин.
Катнашучылар шулай ук туфракның уңдырышлылыгын арттыру чаралары, шул исәптән әче грунтларны известьлау, биопрепаратлар куллану һәм кырларның фитосанитар торышын контрольдә тоту, ветеринария кагыйдәләрен үтәү һәм башкалар турында фикер алышты. Кыр эшләре һәм авыл хуҗалыгы җирләрен эшкәртү вакытында янгын куркынычсызлыгы кагыйдәләрен үтәүгә аерым игътибар бирелде.
Дамир Ишкинеев АПК үсешенә комплекслы якын килүнең мөһимлеген ассызыклады һәм катнашучыларны, экологик һәм ветеринария нормаларын үтәп, заманча технологияләрне актив кертергә өндәде. Семинар аграрийлар, экспертлар һәм хакимият арасында районда тармакның төп бурычларын хәл итүгә ярдәм иткән ачык диалог мәйданчыгына әверелде.
Киңәшмәдә катнашучылар шулай ук биологик препаратлар, умартачылык, ветеринария күргәзмәсе белән танышты.