Нурлат районында илкүләм проектлардан файдалану мөһим объектларны төзергә һәм капиталь ремонтларга ярдәм итәчәк
Нурлат районында социаль һәм инфраструктура өлкәләрен үстерүгә юнәлдерелгән илкүләм проектлар актив гамәлгә ашырыла.
«Озын һәм актив гомер» илкүләм проекты кысаларында Нурлат районы авылларында 2 фельдшер-акушерлык пункты төзү һәм 8 фельдшер-акушерлык пунктына капиталь ремонт ясау планлаштырыла.
Мәсәлән, Красномайский бистәсендә ФАПка капиталь ремонт 90 проценттан артыграк дәрәҗәдә башкарылган, Сәләнгеш авылында капиталь ремонт ясау проценты да шул дәрәҗәгә якынлаша. Ә Биләркүл һәм Кизләү авылларында фельдшер-акушерлык пунктлары төзеләчәк, төзелеш эшләре инде алып барыла.
Параллель рәвештә башка юнәлешләр дә үсә. Әйтик, «Тормыш өчен инфраструктура» илкүләм проекты кысаларында агымдагы елда автомобиль юллары гына яңартылмыйча, Кариев урамындагы бульварны төзекләндерүдәге өченче чираттагы эшләр дә дәвам итәчәк. Моннан тыш, «Кадрлар» илкүләм проекты халыкны эш белән тәэмин итү үзәгенең матди-техник базасын яңартырга мөмкинлек бирәчәк, бу район халкы өчен хезмәт күрсәтүнең сыйфатын яхшыртачак.
Илкүләм проектлар нәтиҗәсендә районда территорияләрне комплекслы үстерү уңышлы алып барыла. Бу чараларның барысы да нурлатлыларның тормыш сыйфатын яхшыртуга юнәлдерелгән.