Минталип Миңнеханов авылдашлары өчен традицион күмәк ифтар мәҗлесен уздырды
Изге Рамазан аеның 12нче көнендә Кәкре Атау авылында ел саен уза торган 100гә якын кешене берләштергән коллектив ифтар уздырылды. Күркәм традициягә әверелгән чараны якташыбыз, Татарстан Республикасының танылган фермеры Минталип Миңнеханов үз гаиләсе исеменнән оештырды.
Вакытлыча кунакчыллык үзәгенә әверелгән җирле мәктәп бинасында мул итеп өстәлләр әзерләнгән иде. Җәмәгать ифтарына төрле буын вәкилләре: өлкәннәр, яшьләр, балалы гаиләләр җыелды. Монда катнашучыларның күбесе Минталип Исмәгыйль улын яшь чагында ук хәтерли, ә бүген аның уңышлары белән горурлана.
Тукай районында крестьян-фермер хуҗалыгын һәм «Бердәмлек» кооперативын җитәкләгән Минталип Миңнеханов авылдан дистәләгән еллар элек киткән, әмма аның тормышында актив катнашуын дәвам итә. Ул якташларына инфраструктураны төзекләндерүдә, дини һәм мәдәни чараларны оештыруда ярдәм итә, шулай ук бердәмлекнең һәм үзара ярдәмләшүнең мөһимлеген ассызыклап ел саен җәмәгать ифтарын оештыра.
Ифтар вакытында Минталип Исмәгыйль улы якташларына мөрәҗәгать итеп, яшьләрне ислам кыйммәтләре рухында тәрбияләргә өндәде. "Бер очрашу - ул тулы бер гомер. Мондый чаралар безне берләштерә, традицияләребезне саклап калу өчен хезмәт итә. Шәфкатьлелек, өлкәннәргә хөрмәт, якыннарыбыз турында кайгырту - безнең иманыбызның нигезе", - дип билгеләп үтте ул. Ахырда Минталип Исмәгыйль улы – Рамазан аенда ниятләренең сафлыгын гәүдәләндерүче садаканы өләште.
Гәйтән авыл җирлеге башлыгы Наталья Авдеева Минталип Исмәгыйль улына җирлек тормышында актив катнашуы өчен Рәхмәт хатын тапшырды. «Сезнең юмартлыгыгыз - үз тамырларыгызны истә тотуның мөһим үрнәге", - диде ул. Рәхмәт сүзләренә авылдашлары да кушылып, тирән рәхмәтләрен белдерделәр.
Соңыннан авылның имам-хатыйбы Тәслим хәзрәт Кәлимуллин Коръән сүрәләрен укыды, ә мәҗлескә җыелганнар, Минталип Миңнехановка һәм ифтар оештыруда катнашучыларга сәламәтлек, уңышлар теләп, догаларга кушылдылар. Догалар тынычлык һәм иминлек теләү белән тулыланды.
Халык билгеләп үткәнчә, быел изге ай аерым бер рухлану белән уза. Мәчеттә һәркөнне ифтар мәҗлесләре, тәравих намазлары уза, авыл халкы игелекле эшләргә күбрәк игътибар бирә. «Якташыбызның ифтар мәҗлесе кебек очрашулар оештыруы безгә игелек һәм бердәмлек - төп байлык икәнен искәртә", - дип уртаклаштылар алар.