Нурлат районы Башлыгы Дамир Ишкинеев көнбагыш мае җитештерү заводында булды
Бүген Нурлат районы Башлыгы Дамир Ишкинеев Нурлатта узган елның сентябрь ахырында эшли башлаган «MAY OIL» рафинирланмаган май җитештерү заводында булды. Башкарма директор Рәфис Хәмзин һәм завод белгечләре озатуында Дамир Азат улы складларда, җитештерү цехында, лабораториядә һ.б. булды. Бүген завод тәүлегенә 100 тоннага кадәр көнбагыш эшкәртә, аны җирле районнардан да, республиканың башка районнары һәм Россия төбәкләре җитештерүчеләреннән дә сатып алалар. Нурлатта җитештерелгән чистартылмаган май алга таба эшкәртү өчен зур күләмдә җибәрелә. Әмма, Рафис Рафикович билгеләп үткәнчә, җитештерүне киңәйтү һәм ваклап сатуны башлап җибәрү планлаштырыла.
Көнбагыш мае җитештерү линиясе белән танышып, Дамир Азат улы завод коллективы белән аралашты.
"Яңа җитештерү юнәлеше ачылуы районыбыз өчен бик мөһим. Чөнки көнбагыш, рапс кебек техник культуралар үстерү мәйданнары киңәя. Заводны ачу нурлатлыларны эшкә урнаштыру ягыннан да мөһим, бүген монда 47 яңа эш урыны булдырылган. Без Рәзил Миневазир улы Вәлиәхмәтовка производствоны нәкъ менә бездә, Нурлатта ачуы өчен рәхмәтлебез", - диде ул, эшчәнлекнең уңышлы булуын теләп, темпларны киметмәскә киңәш итте.
Район Башлыгы коллективны үз продукциясе белән бу атнада башланачак авыл хуҗалыгы ярминкәләрендә катнашырга чакырды. Мөгаен, тиздән районда яшәүчеләрнең дә Нурлатта җитештерелгән майны татып карау мөмкинлеге туар.