Нурлат муниципаль районы Советында хокук бозуларны профилактикалау буенча ведомствоара комиссия утырышы узды
Комиссия утырышында бу хакта һәм хокук бозуларны профилактикалау буенча башка темалар турында сөйләшү булды.
Кичә Нурлат муниципаль районы Советында хокук бозуларны профилактикалау буенча ведомствоара комиссия утырышы узды. Утырыш комиссия секретаре Александр Ханеняның алдагы утырыш беркетмәсенең үтәлеше турындагы хисап докладыннан башланды. Аннары җыелучылар Россия Эчке эшләр министрлыгының Нурлат районы буенча Эчке эшләр бүлегенең полиция начальнигы урынбасары вазыйфаларын вакытлыча башкаручы Ринат Төхвәтуллинны тыңладылар. Ул 2024 елның 6 аенда җинаятьчелекне кисәтү эшенең торышы һәм аның тискәре тенденцияләрен профилактикалау чаралары, шул исәптән аның рецидив формалары турында сөйләде. Докладчы билгеләп үткәнчә, хисап чорында 257 җинаять теркәлгән, бу узган елның шул ук чоры белән чагыштырганда 18 гә азрак. Комиссия рәисе, Нурлат районы Башлыгы Дамир Ишкинеев көнкүреш нигезендә кылынган җинаятьләр саны кимүгә карамастан, моңа аерым игътибар бирергә өндәде. Ул хокук саклау органнары хезмәткәрләрен мондый очраклар турында хокук бозучыларның эш урыннарына хәбәр итәргә һәм аларның коллективларда үз-үзләрен тотышын карарга чакырды.
Комиссия утырышында шулай ук миграция, законсыз миграциягә каршы тору, чит ил гражданнары һәм гражданлыгы булмаган затлар тарафыннан хокук бозуларны ачыклау, булдырмау һәм хокук бозу өлкәсендә дәүләт сәясәтен гамәлгә ашыруны карадылар. 1 июльгә Россия Эчке эшләр министрлыгының Нурлат районы буенча Эчке эшләр бүлегендә 368 чит ил гражданы миграция исәбендә тора. Чит ил гражданнарының иң күп саны Үзбәкстаннан-195, Таҗикстаннан – 99, Әрмәнстаннан-28, мигрантлар арасында Вьетнам гражданнары да бар-2.
Утырыш азагында район Башкарма комитетының мәгариф бүлеге җитәкчесе Алсу Рәхмәтуллина социаль-психологик тест һәм мәгариф мохите иминлеген мониторинглау нәтиҗәләре, мәгариф оешмаларының иминлеген тәэмин итү, укучылар һәм яшьләр арасында Интернет мәгълүмат-телекоммуникация челтәрендә деструктив контент таралуга каршы торуга юнәлдерелгән чаралар белән таныштырды. Ул социаль-психологик тест нәтиҗәләренә җентекләп тукталды һәм хәвеф-хәтәр төркеменә кергән яшьләр арасында башкарыла торган эшләр турында сөйләде. Әйтик, әлеге төркемдәге һәр укучыга индивидуаль маршрут формасы эшләнгән, сыйныф коллективы белән эш алып барыла һ. б.