НУРЛАТТА БӨТЕНРОССИЯ АГАЧ УТЫРТУ КӨНЕ ҖОМГАДАН БАШЛАНДЫ

Татарстанда ул Экологик культура һәм әйләнә тирәне саклау елы кысаларында уза.
Көндезге өчләрдә Нурлатның көньяк-көнбатыш микрорайонында 50ләп кеше бу игелекле эштә иде инде.
– 900 метрлап җирдә 3 рәт итеп агач утыртырп чыгачакбыз,–диде “Нурлат урманчылыгы” ГКУсы җитәкчесе Искәндәр Усманов агачларның кешелеккә китергән файдасы турында әллә никадәр фактларны да өстәргә җай табып.–Бүген бу эштә урман хуҗалыгы хезмәткәрләре һәм яшь урманчылар мәктәбе шәкертләре катнаша, күрәсезме, ничек тырышып эшлиләр егетләр!
Егетләр, чыннан да , җитәкчеләре Татьяна Чибидина җитәкчелегендә бу эшне бар шартына китереп башкаралар иде.
–Иртәгә тагы ике сыйныфыбыз агач утырту эшенә чыгачак,–диде Татьяна Ивановна елдагыча мондый акцияләрдә актив катнашачакларын әйтеп. Нурлат муниципаль районы башкарма комитеты җитәкчесе урынбасары вазифаларын башкаручы Равил Кузюров та  акциядә катнашырга вакыт тапты. Көр күңел белән исәнләште дә тизрәк көрәккә тотынды:
–Ягез, хәерле сәгатьтә!
Ул арада яшьләрчә җитезлек белән өч үсентене утыртып та куйды. Яңа җитәкченең Нурлат җирендәге тәүге агачлары иде бу.
–Нык тамырлы булып, гөрләп үссен!–диделәр катнашучылар әлеге теләккә   киң төшенчә өстәп.
Яшь үсентеләр сан күзгә күренеп арта торды.
–Бүген бу зур эшнең башы гына әле. Иртәгә шәһәрнең Кариев, Самаренкин урамнарында эшләячәкбез. Шәһәрдәге һәр ТСЖ 50әр төп  агач утыртырга булды. Киләсе атнадан бу эшкә предприятие-оешма коллективлары да кушылачак,–диде Нурлат шәһәре башкарма комитеты җитәкчесе Рәмис Кәримов.
Әлбәттә, бу игелекле акциядән авыл җирлекләре дә читтә калмаячак.
–Бу көннәрдә авыл җирлекләре 100әр, 200әр төп үсентеләр алалар безнең питомниктан,–диде “Восход” участок урманчылыгы лесничие Михаил Кузнецов.–Димәк,  районыбыз тагы да  яшелләнәчәк.
 Ә яшеллек ул–матурлык кына түгел, саф һава, сәламәтлек тә бит әле!