Кайгырту җылы сүздән башлана

25 сентябрьдән районда Өлкәннәр ункөнлеге бара.
Гомер көзләренә кергән олыларыбызга кояш нуры кебек җылылык, яктылык китерә торган кайгырту, хөрмәт, ярдәм күрсәтүгә чакырылган игелекле көннәр бу. Әти-әниләребезнең ешрак хәлен белергә, әби-бабайларыбызга күчтәнәчләр өләшергә, остазларыбызны искә алырга, ветераннарыбызга тагы бер кат рәхмәт әйтергә бик матур форсат. Бераз гына зарланып алсалар да тыңларга авырсынмыйк, хәлдән килгәнчә проблемаларын хәл итәргә булышсак та әйбәт булыр. Район күләмендә алар өчен үткәрелә торган күптөрле чараларны гына түгел, үз якыннарының игътибарын да көтеп алалар бит алар. Әнә, сишәмбе көнне Нурлат картлар интернат-йортында  Нурлат районы башкарма комитеты җитәкчесе вазифаларын башкаручы Равил Кузюровның килүенә дә ничек күңелләре булды өлкәннәрнең: рәхмәт, хәл белешәсез, диделәр (рәсемдә). Шифаханәдәге шикелле бар уңайлыкларда гомер кичерүче бу өлкәннәргә дә  бары  игътибар, хәл-әхвәл сорашу гына кирәк икән.
Визитка кадәр районда Бөек Җиңүнең 70 еллыгына әзерлек һәм аны үткәрү буенча оештыру комитетының киңәшмәсендә дә сүз сөреше шул юнәлештә барды. Бүген безнең районда  сугышта катнашучылар һәм сугыш инвалидлары 103әү яши. Еллар аяусыз, ә олыларның гомер исәбе көннәр белән бара. Шуңа да сугыш һәм тыл ветераннарына, толларга, блокада мәшһәрен кичерүчеләргә ихтирам, аларның социаль хокукларын тормышка ашыру, көнкүреш проблемаларын хәл итүне эченә алган район планында чаралар датасы инде бүгеннән, иртәгедән билгеләнгән. Аны җентекләп бәян иткән райбашкарма комитеты җитәкчесе урынбасары Рәмзия Сингатуллина да, үз тармаклары буенча өстәмә чыгыш ясаган җаваплы социаль служба җитәкчеләре дә бар нюансларны истә тотарга тырышканнар. Районда бу уңайдан тупланган эш тәҗрибәсе дә искә алынмый калмады. Район планындагы  эшчәнлекнең юнәлешләре исә төрле: киң спектрда социаль мәнфәгатьләрнең үтәлешен тәэмин итү, өлкәннәрнең сәламәтлеген кайгырту, аларның  тормыш үрнәген патриотик тәрбия бирүдә файдалану, буыннар эстафетасы,  волонтерлык хәрәкәте, хәтер вахтасы, эзләнү эшләре... Ә менә максат бер: Җиңүне якынайткан һәр кеше аерым эчкерсез кайгырту тойсын, олыгайган көннәрен илебезнең, республикабызның, районыбызның һәм дә якыннарының ихтирамына тиенсен. Киңәшмәне алып барган район башкарма комитеты җитәкчесе вазифаларын башкаручы  Равил Кузюров та, анда катнашкан республика баш санитар табибы Марина Патяшина да йомгаклау сүзләрен шул фикер белән тәмамладылар.