Шимбә көнне ярминкәсен президент карады

Казан Агросәнәгать паркында узган шимбә көнне үткән ярминкәгә безнең Нурлат районыннан 42 машина белән ихтыяҗ зур булган товарлар алып барганнар.
– Авыл җирлекләре башлыклары ярдәмче хуҗалыкларда җитештерелгән яшелчә, җиләк-җимеш, сөт продуктлары алып бардылар,–диде Нурлат муниципаль районы башкарма комитетының территориаль үсеш бүлеге җитәкчесе Рәзинә Хисаметдинова.– “Сөләйманов Ә.И.” хуҗалыгыннан һәм фермер хуҗалыкларыннан бәрәңге, авыл хуҗалыгы берләшмәләреннән бөртек бик әйбәт үтте. Бу юлы ярминкәгә 5 эшмәкәр дә барган иде.Алар алып барган сөт, свеҗий балык, ит, кондитер әйберләре дә үтемле товар булып чыктылар.Һәр сату ноктасы матур бизәлеше белән дә сатып алучыларны җәлеп итәрлек иде. Нәтиҗәдә, Казан халкына бу көнне 1,5 миллион сумлык товар сатылды,–диде ул.
Районның мәдәният бүлеге хезмәткәрләре сәхнәгә кадәр алып барып, казанлыларга матур җырлары белән дә бәйрәм кәефе бүләк иткәннәр. Алып баручы Валентина Голубеваның мондый концертларны оештырудагы тәҗрибәсе бу юлы да нурлатлылар мәйданчыгына халык агымын күпләп китерергә булышкан. Ярминкәгә килгән Республика Президенты Рөстәм Миннехановны Нурлат районы рәтендә район башкарма комитеты җитәкчесе вазифаларын башкаручы Равил Кузюров каршы алган һәм озатып йөргән.
Ә 28 сентябрь көнне район җитәкчелеге шундый ук авыл хуҗалыгы ярминкәсен Нурлат халык өчен оештырачак. Өлкәннәр ункөнлеге кысаларында үткәреләчәк әлеге ярминкәдә кышкылыкка яшелчә, җиләк-җимеш, бөртек, урман товарларыннан запас туплап калдырырга мөмкин булачак. Шунда ук ит һәм сөт-сөт продуктлары сату да оештырылачак. Өлкәннәргә алган товарларын озатышырга волонтерлар ярдәме булдыру да күздә тотыла. Әлбәттә инде, һәрвакыттагыча концерт-күңел ачу программасы ярминкәгә бәйрәм рухы өстәячәк.