Нурлат муниципаль районы башлыгы Наил Шарапов вакытыннан алды вәкаләтләрен туктатты

Бүген, 20 сентябрьдә икенче чакырылыш Нурлат муниципаль районы советының  XXXIII сессиясендә депутатлар Нурлат муниципаль районы башлыгы Наил Шараповның вәкаләтләрен вакытыннан алда туктату турындагы гаризасын канәгатьләндерделәр. Сессиядә шулай ук башка эшкә күчү сәбәпле, Нурлат муниципаль районы башкама комитеты җитәкчесе Рамил Кашаповның отставкага китү турындагы үтенечен дә уңай хәл иттеләр. Сессиядә Нурлат  муниципаль районы башкама комитеты җитәкчесе вазтфасын биләүгә конкурс игълан итү турында карар кабул ителде. Әлегә Нурлат башкарма комитет җитәкчесе вазифаларын башкару башкарма комитет җитәкчесенең беренче урынбасары итеп билгеләнгән  Равил Афраим улы Кузюровка йөкләнде.
Сессия эшендә Татарстан Республикасы Дәүләт Советы рәисе Фәрит Мөхәммәтшин катнашты.

Кыскача белешмә

Кузюров Равил Афраим улы
1973 елның 9 гыйнваренда Аксубай поселогында туган. 2001 елда Казан дәүләт архитектура-төзелеш академиясен тәмамлаган.
1995–2005 елларда – шәхси эшмәкәр.
2006–2007 елларда Аксубай муниципаль районы башкарма комитетының «Муниципаль заказлар хезмәте” муниципаль идарәсе генераль директоры.
2007–2010  елларда–Аксубай муниципаль районында архитектура һәм шәһәр төзелеше бүлеге начальнигы, Аксубай муниципаль районы башкарма комитеты җитәкчесенең инфраструктур үсеш буенча урынбасары.
2010–2011 елларда–Татарстан Республикасы Президентының территорияләр белән эшләү буенча идарәсе баш киңәшчесе.
2011 елдан–Татарстан Республикасы экология һәм табигый ресурслар министры урынбасары.