Балалар бакчалары өчен компенсаөияләр үзгәрә

Сентябрьдән балалары бакчага йөрүче гаиләләргә компенсацияләр бирү принциплары үзгәрде. Район мәгариф идарәсенең мәктәпкәчә белем бирү бүлегенннән хәбәр итүләренчә, бакча өчен компенсация күләме ата-аналарның уртача түләвенә бәйле икән.
– Бакча өчен ата-аналар түләвенең уртача күләме Татарстан Министрлар Кабинетының 16.08.13 елгы №564 карары нигезендә расланды, - ди Мәгълүмати – методик үзәк методисты Гөлсинә Измайлова. – Моннан тыш, түләү мәктәпкәчә белем бирү учреждениесенең ничә сәгать эшләвенә бәйле, аннан бакчага йөрүче баланың яше дә исәпкә алыначак. Мисал өчен, бер яшьтән өч яшькәчә бала 12 сәгать эшли торган бакча һәм төркемгә йөри икән, уртача ата-ана түләве 1341 сум тәшкил итәчәк, ә 3-7 яшьлек балалары булган ата-аналар өчен ул 1204 сум. Кабатлап әйтәм, алда китерелгән бәяләр уртача исәпләнгән саннар. Һәр бакчада аның категориясеннән чыгып ата – аналар түләве төрлечә:безнең районда ул 1200дән 1600 сумлар тирәсе. Компенсация күләмен формула буенча исәпләргә мөмкин. К=С×Р
К-компенсация күләме
С- ата-ана түләвенең уртача күләме
Р-ата-ана түләвенең проценты (20 процент беренче балага, 50 процент икенче, 70 өченче өчен).
Әгәр бала бакчага йөрмәсә, яки тулы ай йөрмәсә, компенсация күләмен белү өчен түбәндәге формула кулланыла: К=((С-П)+Д×П/М)+Р
П-айлык азык-төлек продуктларын куллану
М-ай дәвамында балалар бакчасының эшләгән көннәре
Д-баланың бакчага йөргән көннәре.
Болары “Мәгариф” законы нигезендә кертелгән кайбер яңалыклар. Балалары бакчага йөргән ата-аналар өчен төп яңалык яңа елдан соң булачак, диләр белгечләр. Чөнки яңа елдан балалар бакчаларына бәяләр артачак икән.