Нурлат районында вакцинация ясау дәвам итә

Быел районда гриппка каршы 33 835 кешене вакцинацияләү планлаштырыла.

План 54 процентка үтәлгән.

"Безгә 20 160 доза вакцина килде, аларны инде 18 360 нурлатлыга ясадык, шуларның 5703е – балалар, – диде Нурлат үзәк район хастаханәсе табиб-эпидемиологы Әсфия Мәхмүтова. - Вакцина белән проблема юк, өстәвенә ул этаплап килә."

Табиб-эпидемиолог хәбәр иткәнчә, параллель рәвештә предприятиеләргә, оешмаларга һәм учреждениеләргә чыгып коллектив вакцинация дә алып барыла. Кискен респиратор авыруларга килгәндә, әлегә ОРВИның аерым очраклары гына теркәлә.