Нурлатлылар "Татарча диктант" акциясенә кушылды
Бүген «Татарча диктант-2023» Бөтендөнья белем тикшерү акциясе старт алды, ул өч көн дәвамында – 13, 14, 15 октябрьдә узачак.
Нурлатлылар ел саен акциядә актив катнашалар. Нурлат шәһәрендә диктант уздырылуның беренче көнендә берничә мәйданчык эшләде. Аларның берсендә, «Нур» татар мәдәнияте үзәгендә Түбән Нурлатта районның мәдәният, мәгариф системасы хезмәткәрләре, микрорайон халкы җыелды.
"Татарча диктант.Яз" акциясе сигезенче ел үткәрелә. Безнең районда ул Бөтендөнья татар конгрессының Нурлат бүлеге, мәгариф һәм мәдәният бүлекләре тарафыннан оештырыла. Акцияне уздыру өчен мәйданчыкларның һәм анда катнашырга теләүче нурлатлыларның саны арта баруы куанычлы. Киләсе елга татар авылларында да мәйданчыклар оештырырга ниятлибез», - дип билгеләп үтте Бөтендөнья татар конгрессының җирле бүлекчәсе җитәкчесе Әлфия Галәүтдинова.
«Нур» мәйданчыгында 50дән артык катнашучы бер сәгать дәвамында татар язучысы Рөстәм Галиуллинның «Таҗетдин Ялчыгол» әсәреннән өзек язды. Диктант өчен текстны 40 еллык эш стажы булган педагогик хезмәт ветераны Румия Гыйрфанова укыды.
"Текст бик катлаулы түгел, язу өчен авыр сүзләрне без тактага яздык. Әлбәттә, туры сөйләм күп, кулланыштан чыккан искергән сүзләр бар, алар катнашучыларда кыенлыклар тудырырга мөмкин. Ләкин, минемчә, барысы да уңышлы булыр», – дип уртаклашты ул.
Микрорайонда яшәүче 71 яшьлек Әфрүзия Тямаева белем бирү акциясендә беренче тапкыр катнашты. Мәйданчыкка мәдәният үзәге хезмәткәрләре чакыруы буенча килгән.
"Мин мәктәпне 55 ел элек тәмамладым, ләкин диктантны рәхәтләнеп яздым. Бик ошады, киләсе елга да катнашырга җыенам», – дип уртаклашты ул.
Ирле-хатынлы Мансур һәм Тәнзилә Әһлетдиновлар акциядә өченче тапкыр катнаштылар һәм татар телен саклауда аның әһәмиятен билгеләп үттеләр.
"Үсеп килүче буын туган телебезне әкренләп оныта бара, ә акция аңа мәхәббәт тәрбияләүгә юнәлдерелгән», – дип билгеләп үттеләр алар.
Диктант ахырында барлык катнашучылар традиция буенча «Туган тел» җырын башкардылар.
Район мәгариф идарәсенең милли мәгариф буенча методисты Фәридә Ярмөхәммәтова сүзләренчә, өч көн эчендә районның 30 мәктәбендә һәм 28 балалар бакчасында да татарча диктант язылачак.
"Мәгариф учреждениеләрендә оештырылган мәйданчыкларда диктантны укучылар, мәктәп директорлары, укытучылар, балалар бакчалары мөдирләре һәм тәрбиячеләр язачак, аларга ата-аналар да кушылачак. Гомумән алганда, акциядә 4 меңгә якын кеше катнашачак», – дип аңлатма бирде ул.
Шәһәрдә шулай ук «Киләчәк» балалар иҗаты үзәгендә һәм Әхмәдзәки хәзрәт Сафиуллин исемендәге мәгариф үзәгендә мәйданчыклар оештырылды.
Диктантны өйдә дә онлайн режимда, туры эфирда «ТНВ-Татарстан» һәм «ТНВ-Планета» телеканалларында яки сайтта http://diktant.tatar/ трансляциягә тоташып язарга мөмкин. Моның өчен сайттан бланкны чыгартып алырга кирәк http://diktant.татар/. Диктант язганнан соң, бланкны сканерларга яки фотога төшерергә һәм электрон почта аша җибәрергә кирәк: tatarchadiktant@gmail.com моннан тыш, диктантны шәхси кабинетта да язарга мөмкин, моның өчен сайтта теркәлү җитә http://diktant.tatar/.