Нурлат мәктәпләрендә экстремизмга каршы дәресләр үтте

Кичә, 3 сентябрь – терроризмга каршы көрәштә теләктәшлек көнендә район мәктәпләре “Экстремизмга-юк!” дип аталган бердәм республика дәресенә кушылдылар. Киекле урта мәктәбендә ул һәр сыйныфта төрле формада – лекцияләр, конкурслар, конференцияләр рәвешендә  узды. Мәсәлән, 2нче сыйныф укучылары “Дуслык, тынычлык” дәресенә җыелдылар. Укытучылары Индира Әхмәтвәлиева балаларга җир йөзендә төрле милләт халыкларының дус-тату яшәүләре хакында сөйләде, гадәттән тыш хәлләр булганда үз-үзеңне ничек тотарга кирәклеген аңлатты. Балалар шулай ук  кызыклы уенда катнашып, үзләренең белемнәрен дә күрсәтә алдылар. Ә өлкән сыйныфларда сөйләшү җитдиерәк булды.  10нчы сыйныф укучылары сыйныф җитәкчеләре Гөлшат Мөхәммәтова җитәкчелегендә яшьләр мохитында экстремизмны профилактикалау хакында сөйләштеләр. Укучылар Диләрә Хәбибуллина һәм Алинә Билданова интерактив чаралар ярдәмендә чыгыш ясадылар. “Террорчылык һәм  экстремизм дигән төшенчәләр турында сөйләгәндә, моңа җитди игътибар бирергә кирәк. Чөнки бу проблема һәркемгә кагылырга мөмкин”, - диләр кызлар. 9нчы сыйныфларда әңгәмә рәвешендә барган дәрес темасы моннан 9 ел элек Бесланда булган вакыйгаларга бәйләнеп китте. 9нчылар сыйныф җитәкчеләре Гөлсинә Мортазинаның ул елның канлы 1 сентябрь көнен искә алып, әлеге фаҗигане бөтен ил белән бергәләшеп кичерүләре хакында сөйләвен игътибар белән тыңладылар, үзләре дә әңгәмәгә кушылып, фикерләрен белдерергә ашыктылар. “Экстремизм һәм террорчылыктан бер гөнаһсыз кешеләр зыян күрә, башка милләтләрне  ихтирам иткән кеше беркайчан да мондый юлга бармас. Әлеге афәтләргә каршы бергәләшеп көрәшергә кирәк”, -  дигән нәтиҗә ясады укучылар.
Мәктәптә исә чаралар бер көн белән төгәлләнми. Ай дәвамында сыйныф сәгатьләрендә һәм тормыш иминлеге нигезләре дәресләрендә бу хакта сөйләшү дәвам итәчәк, мәктәп китапханәсендә күргәзмәләр, диспутлар оештырырга ниятлиләр.