Нурлат муниципаль районында яңа башлык сайланды
Район Башлыгы итеп Нурлат муниципаль районы Советы депутаты Дамир Ишкинеев сайланды, моңа кадәр ул районның нефть предприятиеләренең берсен җитәкләде.
Чираттан тыш сессиянең төп мәсьәләсе Нурлат муниципаль районы башлыгы Алмаз Әхмәтшин вәкаләтләрен вакытыннан алда тапшыру иде.
Бүген шәһәр Мәдәният сараенда Татарстан Республикасы Нурлат муниципаль районы Советының чираттан тыш XXVIII сессиясе узды. Анда Татарстан Республикасы Премьер - министры Алексей Песошин, Татарстан Республикасы Рәисе Администрациясе җитәкчесенең беренче урынбасары-Татарстан Республикасы Рәисе территорияләр белән эшләү идарәсе башлыгы Илнур Гарипов, Татарстан Республикасы Дәүләт Советы депутатлары Шамил Яһүдин, Рәис Сөләйманов, Людмила Рыбакова һ. б. катнашты.
"Бүген без соңгы биш ел дәвамында район белән уңышлы җитәкчелек иткән Алмаз Сәлим улы Әхмәтшинның вакытыннан алда вәкаләтләрен калдыруын кабул иттек.
Смоленск өлкәсе Думасы Алмаз Сәлим улының Смоленск өлкәсе губернаторы урынбасары вазыйфасына билгеләнүен килештерә. Ил Президенты Владимир Владимирович Путин Татарстан идарәчеләренең федераль һәм региональ органнарга ихтыяҗын күп тапкырлар билгеләп үтте, безнең республиканы кадрлар чыганагы дип атады. Алмаз Сәлим улы җитәкчелегендә соңгы елларда Нурлат районында территориаль үсешнең күп кенә мәсьәләләре хәл ителде, муниципаль берәмлекнең социаль-икътисади үсешенең күренекле нәтиҗәләренә ирешелде. Районның тулаем территориаль продукты соңгы 5 елда ике тапкыр артып, узган ел йомгаклары буенча 88,4 миллиард сумга җиткән, икътисадның төрле тармакларында 27 инвестиция проекты гамәлгә ашырылган, инвестицияләрнең гомуми күләме 51 миллиард сумнан артык тәшкил иткән. Чулпан ятмасыннан район өчен 960 миллион сумнан артык суүткәргеч төзелә. Бүгенге төзеклек дәрәҗәсенә һәм Нурлат шәһәренең тышкы кыяфәтенә илнең күп кенә шәһәрләре көнләшергә мөмкин, бу шулай ук Әхмәтшин Алмазының бәяләп бетергесез өлеше», – диде Алексей Валерьевич, шулай ук Татарстан Республикасы Рәисе Рөстәм Нургали улы Миңнеханов исеменнән республика Хөкүмәте Алмаз Әхмәтшинга уңышлы эше өчен рәхмәт сүзләрен җиткерде һәм бүләк итеп «Дуслык» орденын тапшырды.
Алексей Песошин Татарстан Республикасы Рәисе Рөстәм Нургали улы Миңнехановның йөкләмәсе буенча район башлыгы итеп район Советы депутаты Дамир Ишкинеевны сайлау турында тәкъдим кертте.
"Аның кандидатурасы сезнең өчен тәкъдим итүгә мохтаҗ түгел, сез аны бик яхшы беләсез, Дамир Азатовичның бөтен биографиясе туган Нурлат районы белән бәйле. Үзенең хезмәт эшчәнлеге елларында ул зур эш тәҗрибәсе туплый, үзен яхшы хуҗалыкчы гына түгел, ә социаль җаваплы кеше буларак та күрсәтә»,-дип билгеләп үтте Алексей Валерьевич.
"Соңгы елларда безнең районда, чыннан да, масштаблы эшләр башкарылды, һәм үз максатларыбызга республика җитәкчелеге ярдәменнән башка ирешә алмас идек. Моның өчен шәхсән үзем һәм барлык нурлатлылар исеменнән Татарстан Республикасы Рәисенә, республика Хөкүмәте Рөстәм Нургали улы Миңнехановка рәхмәт белдерәм. Хезмәтемне югары бәяләгәне өчен дә рәхмәтлемен, әмма бу югары бүләкне мин шәхси казанышым буларак кына түгел, ә районның барлык тырыш халкы ирешкән дәрәҗә буларак та кабул итәм. Дамир Азатович-районыбызда хөрмәтле гаиләдән чыккан, аның вәкилләре күп еллар районыбыз файдасына эшләгән. Аның әтисе Азат Гасыйм улы Ишкинеев исеме белән шәһәребезнең бер урамы аталган», - диде Алмаз Әхмәтшин, Дамир Ишкиниевка яңа вазифада уңышлар теләп.
Аннары сессия утырышы яшерен тавыш бирү юлы белән дәвам итте, анда Нурлат муниципаль районы Советы депутатлары бертавыштан район башлыгы вазифасына Дамир Ишкиниев кандидатурасы өчен тавыш бирде.
"Мин монда тудым, үстем, эшлим, монда әти – әнием яшәде һәм эшләде, озак еллар район Советы депутаты булып торам-болар барысы да минем кече Ватаныбыз файдасына лаеклы эшемнең ышанычлы гарантиясе булыр дип уйлыйм. Район башлыгы вазифасын халкыбыз алдында зур җаваплылык буларак кабул итәм, күрсәтелгән ышанычны аклар өчен барысын да эшләячәкмен. Мин барлык белемнәремне, тәҗрибәмне, энергиямне районның алга таба уңай үсеше өчен кулланачакмын», – диде Дамир Азатович.
Монда ук тантаналы шартларда ул Нурлат муниципаль районы башлыгы антын кабатлады.
Сессиянең көн тәртибендәге өченче мәсьәләне карау кысаларында Дамир Ишкиниев лаеклы һәм фидакарь хезмәте өчен Алмаз Әхмәтшинга Нурлат шәһәренең Мактаулы гражданины таныклыгын һәм билгесен тапшырды.