Нурлатта коррупциягә каршы тору мәсьәләләре буенча фикер алыштылар
Район Советының зур залында Нурлат районында коррупциягә каршы тору эшен координацияләү буенча комиссия утырышы узды.
Утырыш комиссия рәисе, район башлыгы Алмаз Әхмәтшин җитәкчелегендә узды.
Комиссия әгъзалары дүрт мәсьәләне карады.
Район башлыгының коррупциягә каршы тору мәсьәләләре буенча ярдәмчесе вазыйфаларын башкаручы Александр Ханеня катнашучыларга керемнәр, чыгымнар, мөлкәт һәм мөлкәти характердагы йөкләмәләр турында мәгълүматны тутыру буенча методик киңәшләр бирде, шулай ук интернет сайтларның адреслары яки сайт битләре турында мәгълүматны бирү вакыты һәм тәртибе турында искә төшерде.
Алмаз Әхмәтшин авыл җирлекләре башлыкларына, җирле үзидарә органнары һәм муниципаль бюджет учреждениеләре җитәкчеләренә бюджет акчаларыннан нәтиҗәле файдалануны контрольдә тотуны тәэмин итәргә, акчаларны законсыз куллануга юл куймау буенча чаралар күрергә кушты.
Утырыш барышында комиссия әгъзаларына шулай ук җирле үзидарә органнары тарафыннан бюджет акчаларын максатчан файдалануга һәм рациональ тотуга финанс контролен гамәлгә ашыру, гражданнарга социаль түләүләр рәсмиләштергәндә халыкны социаль яклау өлкәсендәге эш нәтиҗәләре турында хәбәр иттеләр.