Нурлатлылар Сабан туенда «Батырлар ярышы»нда көч сынашты
16 команда арасында иң кыю һәм җитезләрен ачыкладылар.
«Сабан туе» татар халык бәйрәме кысаларында узган «Батырлар ярышы» быел Нурлатта икенче тапкыр узды, анда оешма-предприятиеләр, учреждениеләр командалары катнашты.
Командалы марш-бросок рәвешендәге спорт-экстремаль йөгереш катнашучылардан бик күп көч һәм җитезлек таләп итте. Уннан артык төрле каршылыкларны, катнашучылар бер-берсенә ярдәм итеп, бердәм командада эшләп уздылар.
Хатын – кызлар арасында җиңүне мәдәният бүлеге командасы яулады, икенче урында – Нурлат җылылык челтәрләре, өченчедә-Әлмәт җылылык челтәрләре.
Ир-атлар командалары арасында җиңүне «Татбурнефть-ЛУТР»командасы яулады. Икенче һәм өченче урыннарны «Хәрби-Диңгез Флоты» һәм «Һава-десант гаскәрләре» бүлеште.
Җиңүчеләргә һәм призерларга Сабан туеның төп сәхнәсендә Татарстан Республикасы Дәүләт Советы депутатлары Людмила Рыбакова һәм Шамил Яһудин дипломнар һәм бүләкләр тапшырды.