Нурлатта наркотикларга каршы көрәш комиссиясенең чираттагы утырышы узды
Нурлатта наркотикларга каршы көрәш комиссиясенең чираттагы утырышы узды.
Тикшерелгән мәсьәләләр арасында 2022 елның узган чоры йомгаклары буенча район территориясендә наркоситуациягә анализ; социаль куркыныч хәлдә булган гаиләләр һәм балигъ булмаганнар белән профилактик эш; наркотикларга каршы көрәш эшчәнлеген мәгълүмати яктан тәэмин итү; «Наркотикларсыз тормыш» республикада наркотикларга каршы айлык үткәрүнең барышы кебек темалар бар.
«Наркотикларга бәйле кешеләрнең төп өлеше – 25 яшьтән алып 35 яшькә кадәр булган затлар һәм яшүсмерләр, шуңа күрә наркотикларга бәйле көрәш даими рәвештә үткәрелергә тиеш", - дип билгеләп үтте Россия Эчке эшләр министрлыгының Нурлат районы буенча бүлеге башлыгы урынбасары Айдар Гыйзетдинов, шулай ук наркотик матдәләрне тартып алу, җинаять һәм административ җаваплылыкка тарту турында мәгълүматлар җиткерде.
Агымдагы елның 5 ае нәтиҗәләре буенча Эчке эшләр бүлеге хезмәткәрләре тарафыннан наркотикларның законсыз әйләнеше өлкәсендә 6 җинаять ачыкланган, бу 2021 елның шул ук чоры белән чагыштырганда 1 җинаятькә азрак. Шул ук вакытта бу өлкәдә 4 җинаять тикшерелгән, аларның 1се наркотик матдәләр сату белән бәйле. Законсыз әйләнештән 150 граммга якын үсемлек наркотиклары, 1 грамм синтетик наркотик алынган.
Нурлат районы хастаханәсенең наркология кабинетының профилактик исәбендә 97 кеше тора, шуларның 16сы – наркотикларга бәйлелек синдромы белән.
«Бу күрсәткечләрнең һәркайсында кешеләрнең язмышлары, аларның тормышы һәм сәламәтлеге торуын онытмаска кирәк", - дип ассызыклады район Башлыгы Алмаз Әхмәтшин.
Наркотикларга каршы комиссия утырышына йомгак ясап, ул яшьләр һәм яшүсмерләр арасында профилактик эшне дәвам итәргә, ә уңай нәтиҗә өчен профилактика, сәламәтлек саклау, полиция, прокуратура һәм массакүләм мәгълүмат чаралары тырышлыкларын берләштерү зарур, дип билгеләп үтте.