Бүген Нурлат районының 179 чыгарылыш сыйныф укучысы өчен соңгы кыңгырау чыңлаячак
Бүген районның барлык мәктәпләрендә мәктәп белән саубуллашу бәйрәменә багышланган тантаналы линейкалар узачак.
Шәһәрнең 2нче мәктәбен тәмамлаучылар өчен бу уку елы уңышлы һәм бай булды. Күпсанлы конкурслар һәм чаралар белән беррәттән, алар республика һәм федераль дәрәҗәдәге олимпиадаларда, спорт ярышларында да яхшы нәтиҗәләргә ирештеләр.
Моннан тыш, 36 чыгарылыш сыйныф укучысының 7 се Укудагы аерым уңышлары өчен медальләр алачак. Алар арасында Александра Рассадина да бар.
«Соңгы кыңгырау – безнең өчен бер үк вакытта шатлыклы да, моңсу да бәйрәм. Бу стеналарда без 1 нче сыйныфтан укыдык, туган мәктәбебез белән аерылышасы килми. Безнең алда яңа офыклар ачыла, һәм без монда алган белемнәребез безгә кирәк булачагына ышанабыз», – дип уртаклашты Александра.
Бүген ул берничә елдан соң туган мәктәбенә укытучы статусында әйләнеп кайтачагы турында уйлана: шунда ук эшли торган әнисе эзеннән китәргә булган. Алда иң җаваплы вакыт – имтиханнар булуга карамастан, балалар Соңгы кыңгырауга җентекле әзерлек өчен дә вакыт таба.
«Без укытучылар һәм ата-аналар өчен видеоотлаулар төшердек, мәктәп территориясендә истәлек рәсеме ясадык. Көн саен диярлек концерт номерларын, хушлашу вальсын кабатлыйбыз", - дип сөйләде активистка Арина Евдокимова, аның Бөтенроссия Олимпиадасындагы уңышы турында без газетаның апрельдәге бер санында язып чыккан идек.
Ислам Закиров, Данил Бархаткин, Виктория Силуянова, Булат Субуханкулов һәм Әминә Хәмидуллина төрле юнәлешләрдә ирешкән уңышлары белән мәктәп бүләкләренең копилкасын тулыландырдылар.
«Без чыгарылыш сыйныф укучылары белән бик горурланабыз, аларга, әлбәттә, имтиханнарны уңышлы тапшыруларын, тормышта лаеклы урын табуларын һәм укытучыларны онытмауларын телибез», – дип теләкләрен җиткерде мәктәп директоры Халидә Шәрәпова.
Бүген районның 179 чыгарылыш сыйныф укучысы өчен күпьеллык уку марафонына нокта куеп соңгы кыңгырау чыңлаячак. Димәк, ваемсыз балачак тәмамлана һәм бөтенләй яңа мөстәкыйль, җаваплы тормыш башлана.
Хәерле юл, чыгарылыш сыйныф укучылары!