Нурлатта хәрби хезмәткә чакырылучылар көне узды
Традиция буенча, бүген шәһәр Мәдәният сараенда Язгы чакырылыш кампаниясендә армия сафларына китәчәк булачак Ватанны саклаучыларны хөрмәтләделәр. Беренче төркем балалар Казан шәһәрендәге җыелма пунктка бу җомгада китәчәк.
Чараның төп кунаклары, әлбәттә, яшүсмерләр һәм аларның әти-әниләре иде. Район үзешчәннәре һәм балалар хореография коллективлары башкаруындагы барлык концерт номерлары, шулай ук сәхнәдән яңгыраган котлау сүзләре аларга багышланды. Район башлыгы урынбасары Линар Маняпов бу чараны тормышта иң мөһим һәм җаваплы чараларның берсе дип атады. Район башлыгы Алмаз Әхмәтшин исеменнән һәм шәхсән үз исеменнән ул булачак ил сакчыларын сәламләде, аларга лаеклы хезмәт итүләрен теләде.
«Без барыбыз да сездән бары тик яхшы яңалыклар гына алсак иде һәм сезнең казанышларыгыз белән горурлансак иде», – диде ул.
Ә нурлатлыларга безнең солдатлар белән горурланырга сәбәп чара барышында ук табылды.
Линар Нурисламович радиацион, химик һәм биологик саклау гаскәрләрендә бер ел хезмәт иткән Гадел Галиуллинга Россия Федерациясе Оборона министрының Мактау грамотасын тапшырды. Гадел акыллы инициатива күрсәтүе, хәрби хезмәт вакытында тырышлыгы һәм аерылып торуы өчен шундый бүләккә лаек булды.
Шулай ук Үзәк хәрби округның баш инспекторы, запастагы генерал-майор Анатолий Молоствов, Нурлат шәһәре һәм Нурлат районы хәрби комиссары Заһир Абдуллин, Әфганстандагы сугыш һәм башка локаль конфликтлар инвалидларының республика иҗтимагый оешмасының җирле бүлекчәсе рәисе Ришат Сафиуллин булачак солдатларга үзләренең котлау сүзләрен җиткерделәр.
Нурлат шәһәре һәм Нурлат районы Хәрби комиссариатының хәрби хезмәткә әзерләү һәм чакыру бүлеге начальнигы Илдус Мазияров РФ Оборона министрлыгының «Хезмәт батырлыгы өчен» медале белән бүләкләнде.
Мәдәният сарае фойесында чара кунаклары өчен күргәзмә оештырылды. Районның барлык мәктәпләре «армия чемоданнары»н тәкъдим итте, ә «Сугышчан туганлык" берләшмәсе әгъзалары үзләренең эзләү экспедициясе турында сөйләде.