Тимерлек мәктәбендә капиталь ремонт киләчәкне күз алдында тотып башкарыла
Бу көннәрдә Советлар Союзы Герое Николай Андреевич Козлов исемендәге Тимерлек төп гомуми белем мәктәбендә уза торган капиталь ремонт аның юбилеена, һичшиксез, иң зур бүләк булачак.
Мәктәпкә 45 ел элек-1977 елда нигез салынган.
Берничә дистә ел эксплуатацияләнүдә булган теләсә кайсы башка төзелеш корылмасы кебек үк, әлеге объект үз вакытында һәм сыйфатлы ремонтка мохтаҗ. Ярдәмгә федераль программа килгән, аның кысаларында 42 миллион 746 мең сум акча бүлеп бирелгән. «Таткоммунжилсервис " ҖЧҖ подрядчы оешмасы исә барлык кирәкле эшләрне башкару бурычын үз өстенә алды.
Сүз балаларның тормыш иминлеге, аларның сәламәтлеге турында барганда, эшләрнең сыйфаты өчен җаваплылык берничә тапкырга арта. Район Башлыгы Алмаз Әхмәтшин подрядчыларның игътибарын нәкъ менә шуңа юнәлтте. Шушы көннәрдә ул мәктәптә булып, анда капиталь ремонтның барышы белән танышты.
«Эшләрне, ким дигәндә, киләсе 50 елда капиталь ремонт үткәрү зарурлыгы тумаслык итеп башкарырга кирәк", – дип ассызыклады Алмаз Сәлимович.
Укучылар саны кимүне исәпкә алып, ул киләчәктә мәктәп базасында күп функцияле үзәк булдыру перспективасын билгеләп үтте. Башка сүзләр белән әйткәндә, мәдәният йорты, фельдшер-акушерлык пункты, авыл китапханәсе кебек социаль әһәмияткә ия учреждениеләр өчен бинаның бер өлеше бүлеп бирелгән.
Проект җитәкчесе Рамил Нуриәхмәтов сүзләренә караганда, бүгенге көндә мәктәптә барлык монтаж эшләре дә диярлек башкарылган.
«Икенче һәм өченче катларны штукатурлыйбыз, спортзал идәннәрен алыштырабыз, электрткәргечләрен монтажлыйбыз, чиратта – җылыту системасы", – дип санап китте Рамил Илшат улы.
Сүз уңаеннан, әлеге объектта башкарылган эшләр күләме көннән-көн арта бара. Аны 15 августка кадәр тапшырырга кирәк.
Капиталь ремонттан соң белем бирү учреждениесе ачылу укучыларны һәм укытучыларны, һичшиксез, рухландырачак, дип саный мәктәп директоры Ирина Машарова. Учреждение коллективы 35 бала һәм 8 педагогны тәшкил итә.
Яңа уку елын алар үзләренең туган, яңартылган стильле һәм заманча мәктәбендә каршылаячак. Әлегә алар өчен уку процессы Елаур мәктәбе базасында оештырылган.