Нурлатта беренче чиратта кирәкле товарлар белән тәэмин итүдә өзеклекләр юк
Район җитәкчелегенең сәүдә нокталарына һәм складларга рейды бүген билгеле бер даирәләрдә булган азык-төлек товарларына кытлык турындагы фикерне кире какты.
Шәһәр үзәгендәге кибетләр челтәренең берсе безне тулы киштәләре белән каршы алды. Кешеләр беренче чиратта күпләп сатып алып калырга күнеккән – шикәр, тоз, карабодай, үсемлек мае барысы да өелеп тора.…
- Безнең кибеттә товарлар ассортименты ике көн саен яңартыла. Азык-төлек кайтуда өзеклекләр юк. Гадәти режимда эшлибез. Бәяләр, нигездә, тотрыклы. Шикәр комы бераз кыйммәтләнде, ә менә карабодай арзаная. Ипи һәм күмәч ризыкларына бәяләр үзгәрмәде, - диде кибет директоры Татьяна Романова.
Район башлыгы Алмаз Әхмәтшин, бәяләрдән һәм ассортименттан тыш, халыкның социаль әһәмиятле товарларга ихтыяҗы белән дә кызыксынды. Кибет директоры сүзләренә караганда, соңгы вакытта сатып алучылар арасында шикәр һәм тозга ихтыяҗ арткан, ә менә ярмалар һәм макарон эшләнмәләренә ажиотаж юк. Алмаз Сәлимович шулай ук балалар товарлары ассортиментына, шул исәптән туклану категориясенә дә игътибарын юнәлтте, чөнки әлеге продуктларга, икътисади вәзгыятькә һәм башка шартларга карамастан, ихтыяҗ зур.
- Безнең кибеттә балалар ризыгы, боткалар, пюреларны сайлау мөмкинлеге зур һәм ул җитәрлек күләмдә, шулай ук памперслар һәм беренче чиратта кирәк булган башка балалар товарлары да бар, – дип дәвам итте ассортимент белән таныштыруын Татьяна Анатольевна.
Сатып алучыларның фикерләрен дә белү безгә бик кызык булды. Безнең үтенечкә өлкән яшьтәге Елизавета Крымкина бик теләп җавап бирде.
- Тормыш үз вакытында безне азык-төлекне артыгы белән алып куярга өйрәтсә дә, хәзер элеккеге кебек дефицит юк. Әйтик, карабодайны капчык белән сатып алу нигә кирәк, ул бит башка ярма кебек үк, аны озак саклап булмый, – дип уртаклашты ул.
Рейдта катнашучылар шәһәрнең азык-төлек складларындагы азык-төлек запасын күреп тә канәгать калды. Он, шикәр, тоз, шулай ук бәрәңге, кишер, кәбестә һәм хәтта җиләк-җимеш тә җитәрлек күләмдә, бу исә якындагы берничә айда район халкын тулысынча тәэмин итеп була дигән сүз.
- Кешеләр социаль әһәмияткә ия булган барлык продуктларның җитәрлек күләмдә булуын белергә тиеш. Борчылырлык сәбәп юк, - диде Алмаз Әхмәтшин. Халыкны кирәкле продукция белән тәэмин итү ситуациясен район җитәкчелеге алга таба да контрольдә тотачак.