Нурлатта беренче өмә узды
Нурлатлылар санитар-экологик икеайлык кысаларында беренче язгы өмәгә чыктылар.
Кояшлы һава торышы һәм яхшы кәеф шимбә көннең ярдәмчеләре булды: иртәнге сәгать 6 дан, шәһәр урамнарында торак-коммуналь хуҗалык идарәче компаниясе хезмәткәрләре шәһәрдә чисталык урнаштырды, бераз соңрак аларга предприятие коллективлары да кушылды. Берәүләр кар өемнәрен таратты, икенчеләре чүп-чар җыйды.
Нурлат муниципаль районы Башкарма комитеты хезмәткәрләре якын-тирәдәге территорияләрдә кар ыргыттылар. “Бик матур һава торышы, без өмәгә көр кәеф белән чыктык”, - дип уртаклашты район Башкарма комитетының балигъ булмаганнар эшләре буенча комиссиясе җаваплы секретаре Гүзәл Ганиева.
НУАД хезмәткәрләре Самаренкин урамын тәртипкә китерделәр – юл буйлары буйлап җыелган пычракны чистарттылар, "Камыр Батыр" балалар бакчасы коллективы тулы составта кар таратты, 9 нчы шәһәр мәктәбенең мөгаллимнәр коллективы һәм өлкән сыйныф укучылары шулай ук көрәкләр белән чыгып - кар өемнәрен таратты, капчыкларга чүп җыйды. Өмәдә Пенсия фондының Нурлат бүлеге, Нурлат бораулау идарәсе, Нурлат үзәк хастаханәсе хезмәткәрләре, эшмәкәрләр һәм башкалар актив катнашты.