Нурлатта сезонлы авыл хуҗалыгы ярминкәсе узды
Бүген иртән Кооператив урамында зур җанлану күзәтелә: районның авыл хуҗалыгы предприятиеләре, фермерлар, шәхси эшмәкәрләр, шәхси ярдәмче хуҗалыклар үз продукцияләренең киң ассортиментын тәкъдим иттеләр. Якты Күлдән Рәмзия Яруллина нурлатлыларга ярминкәдә кош ите тәкъдим итте. Үземнең шәхси ярдәмче хуҗалыкта узган ел 160 каз, 130 үрдәк һәм 250гә якын тавык үсте, - дип уртаклашты ул. – Һәр ярминкәгә чыгарга тырышам, чөнки бу артык продукцияңне сату өчен менә дигән мөмкинлек».
Төрнәс авыл җирлегенең сәүдә ноктасында нурлатлылар бал сатып ала алдылар. Биредә татлы продукция белән Константин һәм Светлана Лизуновлар сәүдә иттеләр.
"Безнең урманда үз умарталыгыбыз бар, 90га якын умарта күчебез бар. Узган ел 3,5 тонна бал җитештердек" – дип уртаклашты гаилә башлыгы.
Иртә таңнан ассортимент һәм бәяләр белән район башлыгы урынбасары Линар Маняпов та танышты. Ул сәүдә рәтләре буйлап узды, шәхси ярдәмче хуҗалыклар хуҗалары, фермерлар белән аралашты.
Сатып алучылар да озак көттермәде. "Ярминкәләрне һәрвакыт көтәм, нигездә, алар турында район газетасыннан беләм, - дип уртаклашты Галина Борзова. – Авыл сөтен, табигый яшелчәләрне сатып алам,алар безнең өчен дә, оныклар өчен дә файдалы. Барысы да бар: алма да, кипкән җиләк-җимеш тә. Менә яңа тотылган балыкны да сатып алачакмын әле".
Импровизацияләнгән сәхнәдә район үзешчәннәре чыгыш ясады һәм нурлатлыларга язгы кәеф бүләк итте.