"Ак Барс" спорт үзәгендә Рөстәм Әхмәтов истәлегенә чаңгы эстафетасы узды
Әлеге эстафетада җиңү өчен 4 команда көч сынашты.
Районда күпсанлы патриотик һәм спорт чараларын оештыручы Әфганстандагы сугыш һәм башка локаль конфликтларда катнашучылар һәм инвалидларының җирле иҗтимагый оешмасы вәкилләре бу юлы үзләре Чечен Республикасында һәлак булган якташыбыз Рөстәм Әхмәтовны искә алуга багышланган спорт эстафетасында катнаштылар.
Кубок өчен көрәшкә төрле гаскәр төркемнәре вәкилләреннән торган командалар кушылды. Бу - "Хәрби-диңгез флоты", "Чик буе гаскәрләре", "Сугышчан туганлык" (Самара өлкәсе Кошки авылы) һәм "Һава-десант гаскәрләре", алар арасында җиңү яулап алу өчен киеренке көрәш башланды. Шунысын да билгеләп үтәргә кирәк, диңгезчеләр беренче минутлардан ук үз кулларына лидерлыкны алып, күчмә кубокны яуладылар. Икенче урында-чик сакчылары, өченчедә – Кошки авылыннан кунаклар. Җанатарлар үзләренең ярышларда катнашучы, флаглар белән финишка килеп җиткән иптәшләренә көч биреп тордылар.
Призерлар һәм җиңүчеләр оештыручылардан – җирле иҗтимагый оешма һәм районның яшьләр эшләре һәм спорт бүлегеннән медальләр, грамоталар һәм истәлекле бүләкләр алдылар.
Чарада Рөстәм Әхмәтовның туганнары – сеңлесе Әлфия Зайчикованың туганы һәм туганнан туган сеңлесе катнашты. Алар җирле иҗтимагый оешма әгъзаларына хәрби бурычны үтәгәндә һәлак булган сугышчыларның истәлеген мәңгеләштерү буенча башкарылган эшләре өчен зур рәхмәт белдерделәр.