Руслан Хөсәенов истәлегенә мини-футбол турниры үтте

Күптән түгел Нурлат футболчылары моннан ике ел элек вафат булган футболчы дуслары Руслан Хөсәенов истәлегенә традицион мини-футбол ярышлары үткәрделәр. Быел ул икенче тапкыр оештырылды. Галимҗан Хөсәенов исемендәге балалар-үсмерләр спорт мәктәбендә үткән ярышларда быел  Нурлаттан 7 һәм Аксубайдан 1 команда көч сынашкан. Көн буена дәвам иткән уеннарда  “АТП-2” командасы аеруча осталык күрсәтеп,  1нче урынга чыккан һәм күчмә Кубокка ия булган. АТП-1 – икенче, ә Аксубай командасы – өченче урыннарда.
-    Быел да турнир зур оешканлык белән үтте. Район башкарма комитетының яшьләр эшләре һәм спорт бүлеге, спорт мәктәбе ярдәм иттеләр. Ә матди ягын Русланның абыйсы Рушан Хөсәенов үз өстенә алды, - ди турнирның инициаторы, “АТП” командасы тренеры Марат Хәмидуллин. – Турнирга Русланның туганнары, тормыш иптәше дә килгән иде. Руслан барыбызның да күңелләрендә ачык күңелле, спортны сөюче яхшы дус булып саклана һәм бу чара һәммәбез өчен дә зур әһәмияткә ия.