Хөрмәтле нурлатлылар!

Сезне чын күңелдән Халыклар бердәмлеге көне белән котлыйм!
Халыклар бердәмлеге көне чагыштырмача яшь бәйрәм булса да, аның тирән тарихи тамырлары бар. Татарстан бүген социаль-икътисади тотрыклылыкка, конфессияара татулыкка һәм милли-мәдәни традицияләрне ныгытуга йөз тоткан вәзгыяте белән дөньякүләм танылу алды. Бу вәзгыять Нурлат районы сәясәтенең дә нигезендә ята. Төп өч милләт – татар, рус, чуваш халкының кулга-кул тотынышып эшләве, тату яшәве безгә район алдында торган иң катлаулы
үсеш программаларын тормышка ашырырга мөмкинлек бирә. Быел ачылган Халыклар Дуслыгы йорты – әнә шушы татулыкка, бердәмлеккә өндәп торучы уртак йортыбыз ул.
Безнең һәрберебез үзенең киләчәген республика, үзе яши һәм эшли торган төбәк язмышы белән бәйли һәм аның тотрыклы үсешен кайгырта. Ватаныбызның лаеклы иртәгәсе, киләчәк буыннарның иминлеге, татулыгы хакына хезмәттә безнең нурлатлылар да зур өлеш кертәсенә шикләнмим. Һәрберебезгә нык сәламәтлек, күңел тынычлыгы, яңа бәхет-шатлыклар телим.
Равил Кузюров, Нурлат муниципаль районы һәм шәһәре башлыгы