Республика көненә бүләк

“Президент белән бергә!” республика иҗтимагый хәрәкәте Республика көненә багышлап игълан иткән “Безнең Республика: Без булдырабыз! Без бергә!” Туган көнең белән, Татарстан!” дип аталган балалар открыткалары  конкурсы дәвам итә.
– Конкурста 7 яшьтән 18 яшькә кадәрге балалар һәм яшьләр катнаша ала, - дип хәбәр итәләр “Президент белән бергә!” хәрәкәтенең Нурлат активистлары. – Катнашу өчен үз кулларың белән открытка ясарга, котлау тексты язарга кирәк,  тышкы ягына исә  “Безнең республика: Без булдырабыз! Без бергә!” һәм “Туган көнең белән, Татарстан!” дигән сүзләр язылган булырга тиеш. Район укучылары ясаган котлау  открыткалары Республика көнендә шәһәр һәм район халкына бүләк ителәчәк. Ә иң яхшы эшләр республика этабына юлланачак.
Открыткалар конкурсына коллектив эшләр дә кабул ителә. Димәк, районның ял һәм сәламәтләндерү лагерьларында ял итүче балалар конурска бергәләшеп башкарган эшләрен дә тәкъдим итә алачак. Ә открыткаларны 15 августка кадәр “Бердәм Россия” партиясенең Нурлат җирле бүлекчәсе башкарма комитетына (Пушкин ур., 46га) китерергә кирәк.