Нурлат өлкәннәре хәйрия бүләге алды

Нурлат картлар һәм инвалидлар йортында яшәүче – 19 кеше хәйрия ярдәменә ия булды.
- Җиңүнең 70 еллыгы кысаларында әлеге  бүләкләрне сугышта катнашучыларга һәм тыл хезмәтчәннәренә Ветераннар (пенсионерлар) иҗтимагый төбәк оешмасы ясады, - ди Картлар һәм инвалидлар йорты директоры Евгений Савинов. – Мондый бүләкләрне  стационар учреждениеләрдә яшәүче ветераннар һәм тыл хезмәтчәннәре алды.
- Яшь вакытта күрмәгәннәрне күрәбез, - ди картлар һәм инвалидлар йортында тәрбияләнүче тыл хезмәтчәне ХәлимәВафина. – Быел аеруча да Җиңүнең 70 еллыгы бүләкләргә бай булды. Ил, республика, район җитәкчеләреннән шәхсән бүләкләр алдык. Инде хәзер хәйрия бүләкләре белән сөендерәләр.
Үзенең туган көнен  - 106 яшьлек гомер бәйрәмен билгеләп үткән көнне Евдокия Казачковага да шундый бүләк тапшырдылар. Ике сугышны кичкән йөзбяшәр әби дә бүләккә бик сөенде.
- Зур рәхмәт, - диде йөзьяшәр үзенә игътибар булуына сөенеп. – Беркайчан да онытмыйсыз. Бүгенге туган көнемә туры китереп тагын бүләк ясадыгыз.
Картлар һәм инвалидлар йортында хәбәр итүләренчә, Җиңүнең 70 еллыга багышланган чаралар ел дәвамында барачак икән.