Атна гомумшәһәр планеркасыннан башланды

Бүген, 27 июльдә район башлыгы Равил Кузюров җитәкчелегендә гомумшәһәр планеркасы үтте. Алдагы планеркада беркетмәгә кертелгән күрсәтмәләрнең үтәлеше турында информацияне район советы аппараты җитәкчесе Олег Микушкин ясады. Көн тәртибенә өч мәсьәлә куелган иде. Нурлат районы укучыларының бердәм дәүләт аттестация нәтиҗәләре уртача республика күрсәткечләреннән югары. Бу хакта информацияне район башкарма комитетының мәгариф идарәсе начальнигы Линар Манәпов ясады. Аерым фәннәр буенча җентекле анализдан уңышлы нәтиҗәләргә ирешкән һәм түбән күрсәткечләр белән калган мәктәпләр мәгълүм булды. Район башлыгы  бу уңайдан Чулпан урта мәктәбе директоры Әнвәр Шәяхмәтовка шәхси канәгатьсезлеген белдерде. Ораторга ирешелгәннәр белән канәгатьләнмичә, һәр мәктәп эшенә җентекле анализ ясарга, белем бирү сыйфатын күтәрү юлларын билгеләргә кушты.
2015 елның 1 яртысында алкоголь продукциясен реализацияләү һәм легаль булмаган алкоголь продукциясен сатуны булдырмау чаралары турында район башкарма комитеты җитәкчесенең беренче урынбасары Руслан Морадыймов чыгыш ясады. Алкоголь эчемлекләр сату узган елның шул чоры белән чагыштырганда 13 процентка кимегән. Сыйфатсыз продукциягә каршы көрәш бара. 10–20 июльдә шул максаттан ункөнлек уздырылган. Алкоголь продукциясе әйләнеше тармагында хокук бозуларны ачыклау һәм булдырмау буенча ведомствоара комиссиянең 13 утырышы үткән, бу уңайдан мобиль төркем булдырылган, рейдлар оештырылган. Ачыкланган очраклар буенча чаралар күрелә.
Планеркада 2015–2016 ягу сезонына  әзерлек турында  район башкарма комитетының төзелеш һәм ТКХ бүлеге началәнигы Илнур Бәхтияров бәян итте. Барлык котельнялар да 20 августка тулысынча әзер булачак, дип ышандырды ул. Район башлыгы моны шәхси контролендә тотачагын әйтте.
Планерка аерым уңышка ирешкән коллективларны котлаулар белән тәмамланды.