Нурлат футболчыларын федерация дә хуплый

Июнь азагында футбол буенча район чемпионаты старт алды. Быел турнирда “Сахарник”, АТП-1, АТП-2, “Нурлатнефть” НГДУсы һәм Егоркино командалары көч сынаша. Чемпионат, гадәттәгечә, ике әйләнештән торачак. Бүгенге көнгә беренче әйләнешнең өч туры төгәлләнде инде. Сишәмбе көнне бу этапның иң төп матчларыннан берсе узды. Моңа кадәр бер җиңелү ачысы да татымаган Егоркино һәм АТП-1 командалары очрашты. Традиция буенча, әлеге командалар арасындагы уеннарның һәркайсы чамадан тыш киеренке уза, бу юлы һәр командадан икешәр уенчының “кызыл карточка” алуы да шуны раслый. Нәтиҗәдә, беренче таймда Руслан Сафин керткән бердәнбер гол “автотранспортчыларга” җиңү алып килде, һәм АТП-1 тугыз очко белән әлегә турнир таблицасының иң башында урын алды. Егоркинолылар алты очко белән икенче урында, өч очколы “Сахарник” өченче баскычта. Ә менә АТП-2 һәм “Нурлатнефть” әлегә бер генә очко да туплый алмадылар. Хәер, “нефтьчеләр”нең футбол кырына чыга алганнары да юк әле. Кызганычка каршы, уенчылары тупланып бетә алмаганлыктан, алар ике “техник җиңелүгә” дучар булдылар.
Әлбәттә, район беренчелегендә биш команда гына катнашуы әлләни саллы күрсәткеч түгел. Әмма бүгенге көндә тулы команда туплый алып, беренчелекнең башыннан азагынача темпны киметмичә уйный алганнарының энтузиазмына сокланырлык. Мәсәлән, АТП ничә ел рәттән инде икешәр команда белән чыгыш ясап килә. Бүгенге көндә Татарстан беренчелегендә уйнаучы “Факел” җыелма командасының да төп өлешен “автотранспортчылар” тәшкил итә.
– Иң мөһиме, егетләрнең теләкләре бар, – ди команданың җитәкчесе Марат Хәмидуллин. – Әлбәттә, кайгыртучан ярдәмчебезнең өлешен дә әйтми булмый. Нурлат АТПсы җитәкчесе Идрис Кәримов булышлыгы белән узган ел ике командага да яңа формалар алдык. Идрис Габделбәрович АТП командасының, “Факел”ның  нәтиҗәләре, хәлләре белән дә һәрдаим кызыксынып тора.
Елның-елында беренчелекнең район статусын күтәрүче бердәнбер авыл командасы – Егоркино егетләренә ничек сокланмыйсың ди? Егоркинолыларның Нурлатта футбол пәйда булганнан бирле район беренчелегендә катнашмый калганнары юк. Ә бит Нурлат футболының тарихы 78нче яшенә аяк басты быел. Команданың тренеры Александр Ендиряков күпьеллык традицияләрне саклый алуларына сөенә. Әмма бу җәһәттән үзенең өлешен тыйнак бәяли.
– Үзем генә мин берни кыра алмыйм, – ди Александр. – Егетләр һәр елны, әйдәгез, команданы туплыйк, әзерләнә башлыйк, дип үзләре киләләр. Командабыз составында укучылар, ялга кайткан студентлар, эшчеләр дә бар. Менә быел да үз көчебез белән футбол мәйданчыгын әзерләдек, уеннарга да үз транспортыбыз белән йөрибез.
Быелгы турнирның мөһим яңалыгы да бар – чемпионатка район тарихында беренче тапкыр профессиональ арбитр хөкемдарлык итәчәк. Анатолий Фадькин – Нурлат егете, заманында беренче мәктәпне тәмамлаган, Нурлат командалары составында футбол да уйнаган. Аннан Казанда һәвәскәрләр лигасында чыгыш ясаган. Шунда ук Татарстан футбол федерациясе аша Футбол арбитрлары мәктәбен тәмамлап, тиешле таныклык алган, аңа “Спорт буенча хөкемдар” категориясе бирелгән. “Казан, Татарстан беренчелекләрендә арбитр булып эшләгәнем булды, әмма туган районым чемпионатында беренче тапкыр хөкемдарлык итәм. Әлбәттә, командалар күбрәк булса әйбәт анысы, әмма булганнары районда иң көчлеләре, һәм әлегә һәр матч мавыктыргыч, кискен көрәштә уза. Иң сөендергәне – командаларда яшьләр күп”, – дип чемпионаттан алган беренче тәэсирләрен уртаклашты Анатолий Фадькин.
Чыннан да, бүген район чемпионатында, сезон дәвамында башка турнирларда чыгыш ясаучы футболчыларыбызның оптимистлыгы күпләргә үрнәк булырлык. Әнә бит, стадион юк, дип ялгыш кына да “балавыз сыкканнары” юк аларның, шикәрчеләр бистәсендәгесен дә хәлләреннән килгәнчә рәткә китереп торалар, узган ел исә аэропорт территориясендә футбол мәйданчыгы әмәлләп куйдылар. Алай гына да түгел, әлеге мәйданчыкта бу атнада Татарстан беренчелеге уеннары узачак әле. Татарстанның ни кырыс футбол федерациясе шундый рөхсәт биргән икән, димәк, футболчыларыбызның тырышлыгы югары дәрәҗәдә лаеклы бәясен алган, дияргә була. Шуңа да без, җанатарлар, трибуналарны буш тотмыйк: район беренчелеге матчларына да йөрик, 11-12 июльдә яраткан “Факел”ыбыз өчен дә тавышларыбызны кызганмыйк.

ЧЕМПИОНАТНЫҢ БЕРЕНЧЕ ӘЙЛӘНЕШ РАСПИСАНИЕСЕ
IV тур
14.07 – АТП-2-“Сахарник”;
15.07 – АТП-1-НГДУ.
V тур
22.07 – Егоркино-“Сахарник”;
23.07 – НГДУ-АТП-2.
Уеннар аэропорт һәм Егоркино мәйданчыкларында 18.00да башлана.