Исән булса, аңа 95 яшь тулыр иде

Бүген Социалистик Хезмәт Герое, Бөек Ватан сугышы ветераны,  VIII чакырылыш СССР Верховный Советы депутаты, 28 ел дәвамында районның “Дружба” колхозын җитәкләгән легендар шәхес–Шәриф Сәгыйрь улы Хафизовка 95 яшь тулган булыр иде.
Аксубай районы, Шәрбән авылында туган Шәриф Сәгыйрович озын фронт юлы һәм органнарда җаваплы хезмәт үткән. Нурлат районына ул 1955 елда КПССның Татар өлкә комитеты тарафыннан колхозларны җитәкче кадрлар белән ныгыту максатыннан юлланган. Утызмеңче Хафизов артта калган “Дружба” колхозын  республиканың гына түгел, Советлар Союзының да үрнәк-күрсәтмә хуҗалыгы итеп күтәргән. Хуҗалык өч тапкыр СССР Халык хуҗалыгы казанышлары медале белән бүләкләнгән, РСФСР хөкүмәте бүләкләренә ия булган. Кызганыч, легендар хуҗалык рәисе 63 яшендә вафат булган. 1985 елда ул җитәкләгән колхозга  Шәриф Хафизов исеме бирелгән. Нурлатлылар легендар шәхесне әле дә олы ихтирам белән искә алалар, аның исемен мәңгеләштерү буенча зур эшләр башкарылган. Шәһәрнең бер урамы Хафизов исемен йөртә, аның бюсты  Хәтер һәм Дан аллеясына куелган , Кама аръягы һәм Нурлат тарихы төбәк музеенда аның турында киң мәгълүмат саклана.