Хәтерлиләр, хөрмәт итәләр

Сишәмбе көнне Түбән Нурлат микрорайонында яшәүче тыл хезмәтчәне  Хәдичә Тямаева үзенең 90 яшьлек юбилеен билгеләп үтте. Юбилярны гомер бәйрәмендә чордашлары, балалары, оныклары, оныкчыклары гына түгел, ә район башлыгы урынбасары Флюра Ногъманова да котлады.  Флюра Рәшитовна Хәдичә әбигә Россия Президентының шәхси котлау открыткасы белән беррәттән район башлыгының да котлауларын һәм бүләкләрен тапшырды. 

90 яшь – тәэсирле дата.  Юбиляр 9 дистә гомер эчендә барлык авырлыкларны үз җилкәсендә татый. Сугыш кыенлыклары, аннан илне торгызуда булышу, яшь көе 3 балалы тол калу...

- Ул чорда барыбыз да шулай яшәдек, - ди тыл хезмәтчәне хәтер яңартып. – Сугыштан алып кайткан ирем яралардан вафат булганда төпчегем – улым Маратыма нибары 3 ай иде. Аңа нибары 28 яшь иде. 

Бәйрәм көнендә район башлыгы урынбасары көр күңелле, оптимист әбигә рәхмәт сүзләрен җиткерде.