Биккол Сабантуенда ГТО да тапшырдылар

Якшәмбе көнне Биккол авылы Сабантуе да авылның яше, картын бергә җыйды.
Бикколлылар Сабантуйны быел да көтеп алдылар. Әле бәйрәмгә берничә көн кала  авыл урамнары буйлап мәдәният йорты хезмәткәрләре, яшьләр һәм балалар уен-җырлар белән бүләк җыйды, күпләр иганәчелек ярдәме күрсәтергә ашыкты. Бәйрәмдә соңгыларына  авыл җирлеге башкарма комитетыннан Рәхмәт хатлары да тапшырылды.
Сәхнә түренә чыгып бүләк алучылар арасында юбилейларын билгеләп үтүчеләр дә, гаилә туйларын үткәрүчеләр дә, хәтта төрле бәйгеләрдә актив катнашкан авыл укучылары да бар иде. Әнә, 55 ел тату гомер кичергән гаиләләр арасында Сөләймановлар, Вафиннар, Шәкүровлар, Билдановлар бар. Ә Мөнҗия һәм Вәзир Закировлар ярты гасыр тату гомер кичерәләр, тагы 5 гаилә көмеш туйларын билгеләп үтә икән быел. Ә менә Әсхәт Сәфәргалиевка  сәхнә түренә хәтта ике тапкыр чыгарга туры килде: юбилее өстенә, тормыш иптәше Хафизә белән гомер коруларына 25 ел да тулган икән быел.
Мәйдан исә уеннардан гөрләп торды. Көянтә белән су ташудан хатын-кызлар гына түгел, ир-егетләр дә читтә калмады, кемдер аркан тартышуда катнашты, кемдер капчык сугышына керде... Быел оештыручылар “Президент белән бергә” хәрәкәтенә кушылып, ГТО нормалары тапшыру өчен спорт мәйданчыгы да булдырганнар иде. Бу көнне 16 кеше  спортның берничә төре буенча үзләрен сынап карадылар һәм иң яхшы күрсәткечләргә ия булучыр Сабантуй бүләкләре дә алды.
- Киләсе елларда да ГТО нормалары тапшыруны традициягә кертергә кирәк, дигән нәтиҗәгә килдек. Бу авыл яшьләрен спортка, сәламәт яшәү рәвешенә тартуның үтемле бер юлы булачак,  - ди авыл җирлеге башлыгы Рамилә Әхмәтшина.
Ә ир-егетләргә, әлбәттә инде, көрәш мәйданында да үзләрен күрсәтергә җай чыкты. Быел да баш батыр исеме  өчен көрәш 11нче сыйныфны тәмамлаган  Радик Шарапов, Арслан Вилданов һәм Рузәл Сәфәргалиев арасында барды. Абсолют җиңү исә Рузәл Сәфәргалиевка насыйп   булды, аңа тәкә белән бергә тузан суырткыч тапшырдылар.
 Сәхнәдә авыл гына түгел, район үзешчәнәренең дә чыгыш ясавы исә бәйрәмгә үзенчәлекле төсмер бирде, мәйдан күп сыйныфташлар өчен дә очрашу урыны булды, тирә-як авыллар халкын да сыйдырды. Теләүчеләрне самавыр чәе, кайнар коймак белән сыйладылар, сәүдә рәтләре гөрләде, шашлык тәкъдим ителде. Ә бикколлылар оештыручыларга рәхмәт әйтеп, киләсе елда да Сабантуй мәйданында очрашырга дип сүз куешып аерылыштылар.