Нурлат прессасы һөнәри бәйрәмнәрен билгеләп үтә

 19 май – Татарстанда матбугат көне. Безнең – журналистлар, газета хезмәткәрләре, матбагачыларның һөнәри бәйрәм көне бу. Озак еллар Пионерия көне булып саналган датаны “үзләштерү” 1998 елдан килә.

Петербургта 1905 елгы революциядән соң чыгарыла башлаган беренче “Нур” татар газетасы милли матбугатның чишмә башы итеп алынган. Димәк, быел без татар матбугатының 110 еллыгын да билгеләп үтәбез. Газетабыз өч телдә чыгарылса да, без – Татарстан матбугат чарасы, димәк, һөнәри бәйрәмдә котлаулар кабул итәргә тулы хокукыбыз бар. Хәер, сәбәп бер анда гына да түгел:

без–84 ел буе район тарихы елъязмасын алып баручы, данлы тарихы булган бердәнбер сәяси-иҗтимагый басма. 2007 елдан без – “Татмедиа” составында, һәм аның районнардагы и ң күп тиражлы, ике тапкыр “Бәллүр каләм” республика журналистларының мәртәбәле бүләген алган дәрәҗәле газетасы. Әлеге үсеш юлында күп каләм ияләренең иҗаты, идеясе, осталыгы үз эзен салган,

алар арасында республикада билгеле исемнәр үсеп чыккан. Беренчеләрдән башлап бүгенге көнгә кадәр эшләп килгән ветераннарыбыз традицияләре әле дә саклана, яңа башлангычлар белән баетыла. Бүген газета елъязмасын һөнәри конкурсларда җиңү өчен бирелгән 60тан артык төрле дәрәҗәдәге Дипломнар бизи, социаль-мәдәни чаралар, игелеклелек акцияләре газетаның бренд буларак дәрәҗәсен күтәрә. Шуңа да һөнәри бәйрәм уңаеннан без иң элек озак еллар хезмәтен газетага багышлаган журналистларга, техник хезмәткәрләргә, матбагачыларга котлавыбызны юлларга ашыгабыз. Безнең белән мәгълүматый кырда хезмәт куйган телевидение, радио хезмәткәрләренә дә озын иҗади гомер телибез.Һәм ниһаять, бүгенге гади булмаган шартларда, мәгълүматның төрле чаралары яшәү һәм укучы өчен көрәшкәндә дә газетаны ихтыяҗлы итү өчен хезмәтен, белемен, иҗатын биргән редакция коллективына, күпсанлы җәмәгать хәбәрчеләренә тирән рәхмәт ирештерү кирәктер. Киләчәктә дә “Дуслык” тотрыклы үсүче, позитив фикерле, объектив, оператив мәгълүмат чарасы булып калсын, аның район тормышындагы роле җитәкчелек, ә көндәлек тормыштагы ихтыяҗы укучы тарафыннан югары бәясен алсын иде!

БӘЙРӘМ БЕЛӘН, ДУСЛАР!