Җиңү бәйрәме бәйгеләре: Герой исемендәге марафонның кырыгынчысы үтте; спорт ветераннары футбол кырында очрашты

Якташыбыз, Советлар Союзы Герое Анатолий Кузнецов истәлегенә традицион җиңел атлетика кроссы, гадәттәгечә, Геройның туган авылы Каравыл Тавында Кузнецов һәм Билгесез солдат һәйкәлләрено веноклар салудан башланды. 

Җиңү бәйрәме уңаеннан кечерәк кенә митингтан соң, ярышларга старт бирелде. Быел кросста 150дән артык спорт сөюче көч сынашты. Ярышта катнашучыларга Вишневая Полянада туып, бүген Ульян шәһәрендә яшәүче якташыбыз, танылган марафончы, халыкара класслы спорт остасы Михаил Горелов та хәер-фатихасын бирде. Каравыл Тавы-Нурлат марафоны быел 40нчы тапкыр уздырыла. “1975 елда башланды аның тарихы. Җиңүнең 30 еллыгы хөрмәтенә җидәү йөгергән идек ул чакта”, – дип хатирәләрен уртаклашты тәүге марафонның җиңүчесе Анатолий Саватников. Беренче ярышларда катнашкан районның тагы бер спорт ветераны Аркадий Романов быелгы бәйгене дә калдырмады. Вишневая Полянадан 67 яшьлек Михаил Волков та стартка басты. Заманында ул да спорт мастерлыгына кандидат нормасын үтәгән спортчы. Гомумән, быелгы узышларда гадәти укучылар, спорт сөючеләрдән тыш, спорт осталыгына кандидатлар, спорт осталары да шактый иде.

Быел атлетчылар 16,5 һәм 6,5 чакрымлы дистанциядә көч сынаштылар. Зур марафонны исә соңгы еллардагы традиция буенча, янә Эдуард Жирнов отты. Оештыручылар юбилей марафонында җиңүчеләрне һәм призерларны тантаналы шартларды котлап, бүләкләр тапшырдылар.

Ә көндезге 12дә шикәрчеләр бистәсендә футбол буенча традицион блиц-турнир старт алды. Быел анда “Нурлатнефть” НГДУсы, АТП, “Факел” һәм “Шикәрче” командалары көч сынашты. Турнирның бизәге исә район һәм шәһәр спорт ветераннары арасындагы иптәшләрчә матч булды.