Нурлат мәктәпләрендә Язгы игелек атналыгы узды

Нәрсә ул игелек? Җирдә нәрсә күбрәк: игелекме,  әллә начарлыкмы?  Игелеклеме мин? Атна дәвамында сыйныф сәгатьләрендә  һәм чараларда  әнә шул һәм башка бик күп сорауларга җаваплар эзләгәннәр мәктәп укучылары. Һәм  игелеккә кайда да урын  бар дигән нәтиҗәгә килгәннәр. Әнә, 1нче сыйныф укучылары сыйныф сәгатьләрендә игелек кылуның  әти-әниләре, дусларына, күрешләренә булышудан  башлануын белгәннәр, үзләренең игелекле эшләрен искә төшереп, алардан  Игелек агачы да булдырганнар хәтта. Ә 2нче сыйныфлар үзләренең игелекле теләкләрен  нурларга язып, тулы бер кояш ясаган.  5нче А сыйныфы укучылары тәкъдим иткән “Һәр кешегә елмаю бүләк ит” акциясе кысаларындагы флеш-моб та мәктәп укучыларын җәлеп иткән. Игелек төшенчәсенең исә мәгънәсе киңкырлы. 5нче Влар, мәсәлән, аны мәктәп ишегалдындагы уен мәйданчыгын чүп-чардан чистартып экологик акция үткәрүдә күргән.  7Б сыйныф укучылары да игелек турында сөйләшеп кенә калмаганнар, бергәләшеп хезмәт ветераны,  тыл хезмәтчәне  Зинаида Михайловна Хорошеваның өенә барып ярдәм итәргә карар кылганнар. Егетләр ишегалдындагы карны көрәгәннәр, ә кызлар өйдә савыт-саба юганнар, тузаннар сөрткәннәр. Кыскасы, Игелек атнасында  мәктәпнең бер генә сыйныфы да игелекле эшләрдән читтә калмаган.