Ханнанов Кубогы 2нче мәктәптә калды

Узган шимбә, 15 ноябрь көнне, 2нче мәктәптә укытучылар арасында Нил Ханнанов истәлегенә традицион волейбол турниры үтте.

2нче мәктәптә озак еллар бу физкультура һәм НВП дәресләре укыткан Нил Әхәтовичны волейбол ярышлары белән искә алу биредә традициягә керде инде. Турнир быел өченче  тапкыр уздырылды. Ярышларга кунак буларак мөгаллимнең җәмәгате Ольга ханым Ханнанова һәм аларның уллары Дмитрий да чакырулы иде. Турниры тантаналы ачу вакытында алар оештыручыларга рәхмәтләрен җиткерделәр, үзе дә күп еллар 2нче мәктәптә хезмәт куйган Ольга Васильевна якты хатирәләрен дәб уртаклашып алды һәм барлык укучыларны да физкультура, спорт белән шөгыльләнергә өндәде. Турнирны исә матур гадәт буенча ветеран-спортчылар һәм укытучылар җыелмасы командаларының очрашуы белән башлап җибәрделәр Ә төп бүләк – Кубок өчен сигез команда көч сынашты. Нәтиҗәдә, 2нче мәктәп барлык көндәшләрен дә җиңеп, үз укытучысы исемендәге Кубокны берәүгә дә бирмәде. Шунысын да әйтик, физкультура укытучысы Эмиль Галләмов җитәкчелегендәге бу мәктәп командасы кадерле трофейны өченче тапкыр рәттән яулады һәм димәк, турнирның регламенты буенча бу Кубок аларга мәңгелеккә калачак дигән сүз.