Сугыш толы, тыл ветераны Халисә әби Сөнгатуллина 90 яшьлеге уңаеннан котлаулар кабул итә

Бүген, 17 ноябрьдә, районның ветераннар Советы рәисе Разия Садретдинова, “Гармония” халыкка социаль ярдәм күрсәтү үзәге директоры урынбасары Эльмира Хәммәдиева юбилярны ветераннарны һәм аларның толларын торак белән тәэмин итү программасы буенча бирелгән фатирына барып котладылар.   Россия Президенты Владимир Путинның  котлау хатын һәм район башлыгы Равил Кузюровның җылы теләкләрен җиткерделәр һәм район хакимияте һәм ветераннар Советының бүләкләрен тапшырдылар. 

Гомере буена Биккол авылында гомер кичергән, бала чагыннан ятимлек ачысын татыган Халисә әби Сөнгатуллина сугышта яраланып кайткан тормыш иптәшеннән яшьли тол кала, балаларын ялгыз тәрбияләп үстерә, бүгенге көндә кызы һәм аның гаиләсе белән гомер кичерә. Котлауларны ул мул табын артында якыннары һәм дуслары янәшәсендә,  зур дулкынлану белән кабул итте, үзен онытмаулары һәм олылаулары өчен рәхмәтләрен җиткерде. 

Иртәгә  озын гомерле юбилярларын  Биккол авыл җирлеге башкарма комитетыннан да өенә барып котларга җыеналар.