Сәламәтлегебезне саклыйк.

Ел азагына якынлаша, димәк, халыкны диспансерлаштыру да төгәлләнеп килә. Быел Нурлат район үзәк хастаханәсендә 9435 кешегә мондый процедура үткәрү планлаштырылган. 7 ноябрьгә 7567 кеше тикшерелгән. Саннар көн саен үзгәреп торса да, яше буенча диспансерлаштырылырга тиешлеләргә ашыгырга киңәш итәләр.
– Чөнки киләсе елга инде алар профилактик чараларны түләүсез үтә алмаячаклар, – диде поликлиниканың терапия бүлеге мөдире Ләлә Фәттахова һәм быел яше 3 санына бүленүчеләр диспансерлаштыру узуын да искә төшерде. – Көйсезлекләрне вакытында ачыклау һәм тиешле ярдәм алу өчен һәркем үзенең сәламәтлеген карап торырга тиеш.
Хастаханәдә әйтүләренчә, быел диспансерлаштыру кысаларында 14 кешедә рак, шулай ук диабет авырулары ачыкланган. Исегезгә төшерәбез, диспансерлаштыру кысаларында корсак куышлыгына УЗИ, маммография узарга, кардиограмма ясатырга, рак күзәнәкләренә анализлар, шулай ук канга биохимик һәм гомуми анализ бирергә һәм башка тикшеренүләр узарга була.  Табиб билгеләп үткәнчә, сәламәтлегебезне карап тору көндәлек норма булырга тиеш.