Нурлат муниципаль районы

Министр Нурлатта өч спорт мәйданчыгын ачуда катнашты

2014 елның 9 августы, шимбә

Бүген, 9 августта Нурлатта ТРның яшьләр эшләре, спорт һәм туризм министры Рәфис Борһанов булып китте. Министр визитының төп максаты шәһәрдә яңа төзелгән спорт мәйданчыкларын ачу иде. Һәм Рәфис Борһанов, район башлыгы Равил Кузюров озатуында аларның һәркайсында булып чыкты.

Шул рәвешле, Нурлатта бер көндә өч спорт мәйданчыгы ачылды: алар шәһәрнең көньяк-көнчыгыш бистәсендә, 1нче мәктәп һәм аграр техникум территорияләрендә урнашкан. Спорт мәйданчыклары республика программалары кысаларында төзелгән. Министр исә мәйданчыкларның нәкъ 9 августта ачылуын символик мәгънәгә ия, дип атады.

– Бүген – Физкультурачылар көне дә бит әле, шундый бәйрәмдә Нурлатта берьюлы өч спорт мәйданчыгы ачылу күңелле хәл, иң мөһиме, алар бер дә буш тормасын иде, – дип теләде ул. Равил Кузюров исә мәйданчыкларның һәммәсе өчен дә булуын билгеләп үтте.

– Без замана белән бергә атларга тырышабыз, һәм бүген ачылган спорт корылмалары һәр нурлатлы өчен дә кулай булыр, бу мәйданчыклар шәһәребезне бизәп кенә калмас, ә сәламәтлегебезне ныгытуга да зур ярдәме тияр, дип өметләнәм, – диде район башлыгы.

Спорт мәйданчыкларын ачу тантаналарында объектларны төзүгә зур өлеш кертүчеләргә, районның спорт тормышында актив катнашучыларга Министрлык һәм район башлыгы грамоталары, рәхмәт хатлары тапшырылды. Моннан тыш, берничә укытучы-тренерга “Татарстан Республикасының физик культура отличнигы” дигән мактаулы исем бирелде.

Рәфис Борһанов берочтан Нурлатта төзелеп килүче яңа стадионда да булды, төзелешнең бүгенге көнгә торышы, эш темплары белән кызыксынды һәм үзенең эшлекле киңәшләрен бирде.

Әлеге чараларда шулай ТР Дәүләт Советы депутаты, “Нурлатнефть” НГДУсы начальнигы Илгиз Салихов катнашты, ул спорт мәйданчыкларына инвенатрь алу һәм мохтаҗ балаларга спорт киемнәре һәм башка кирәк-яраклар алу өчен сертификатлар тапшырды. “Агроинвест” компаниясе җитәкчесе Рәис Сөләйманов та бүләк сертификатлары белән килгән иде.

БАРЛЫК ЯҢАЛЫКЛАРНЫ УКУ