Август кызу булачак

Бүген, 4 августта, Нурлат муниципаль районы башлыгы урынбасары Флюра Ногманова  үткәргән гомумшәһәр планеркасында күпфункцияле үзәк эше һәм районда экологик эшчәнлек мәсьәләләре каралды. КФҮ эшчәнлеге һәм яңа кертелгән хезмәтләр турында информацияне үзәк директоры Татьяна Морозова ясады. Үзәкнең эше активлашып килә. Хәзер биредә бер тәрәзә принцибы буенча 32 дәүләти һәм 88 муниципаль хезмәт күрсәтелә. Быелның 7 аенда гына да аңа 9 меңнән артык кеше мөрәҗәгать иткән. 12 эре авыл җирлегендә ерактан торып эшләүче тәрәзә булдырылган. Бушлай консультация эшли, инфомат куелган. Оратор автомат хезмәт күрсәтү системасы белән бәйле кайбер проблемаларны да атады. Районда экологик эшчәнлек турында табигатьне саклау  буенча инспектор Рөстәм Ногманов хәбәр итте. Экологияне саклау акцияләре  нигездә укучылар катнашында гына үткәрелә, бу чараларда оешма-предприятиеләрнең активлыгы җитми. Шәһәрдә дә авылларда санитар чисталыкны тикшерү буенча рейдлар оештырылып тора. “Чиста һава” акциясе кысаларында 60лап машина тикшерелгән. Һава чисталыгы турында сүз шикәр заводы калдыклары тараткан искә дә  кагылмый калмады. Утырышны алып баручы бу мәсьәләне хәл итүгә завод җитәкчелеген тартырга туры киләчәген әйтте. Планеркада район башкарма комитеты җитәкчесе Әсхәт Габдуллин август аеның чын мәгънәсендә кызу эш чоры булачагын әйтеп, алда торган кичектергесез эшәрне атады, аларны үзвакытында башкарырга кирәк булачагын искәртте.