Төп бурыч – янгыннарны булдырмау

Бу көннәрдә янгын күзәтчелеге бүлекчәсе хезмәткәрләре үзләренең һөнәри бәйрәмнәрен билгеләп үттеләр. 

Озак еллар дәвамында бүлекчәне эчке служба подполковнигы Николай Захаров җитәкли. Өлкән инспектор, эчке служба капитаны Әлмәрис Талипов, дознаватель,  эчке служба капитаны Алексей Матюшкин да биредә 10 елдан артыграк хезмәт итә. 

– Дәүләт янгын күзәтчелегенең төп бурычы - гражданнарны, аларның  тормышын һәм сәламәтлеген, дәүләти һәм муниципаль милекне янгыннардан яклау, - ди бүлекчә начальнигы Николай Захаров. – Күзәтчелек эшчәнлеге бүлекчәсе сәламәтлек саклау, мәгариф, мәдәният, социаль яклау объектларында, торак пунктларда, авыл хуҗалыгы предприятиеләрендә, тимер юлда, нефть объектларында, шәһәр һәм районның халык күпләп була торган урыннарында янгыннарны профилактикалау алып бара. Моннан тыш, инспекторлар гражданнарга янгын куркынычсызлыгы проблемалары турында мәгълүмат бирү белән шөгыльләнәләр. Мәктәпләрдә яшь янгын сүндерүчеләр дружиналары оештыруда ярдәм итәләр, балалар төрле конкурсларда, бәйгеләрдә катнашалар, янгын сүндерү подразделениеләрендә булып, янгын сүндерүчеләрнең хезмәте белән танышалар, техниканы өйрәнәләр. 

Янгын сүндерү инспекторының төп эше – янгыннарны булдырмау. Һәм янгын күзәтчелеге бүлекчәсенең тырышлыгы белән никадәр бәхетсезлек очрагы булдырмый калынгандыр да, мөгаен.