Дүшәмбе көнне районның 20 урта мәктәбендә чыгарылыш кичәләре гөрләде

 Районның 386 чыгарылыш укучысы олы тормыш юлына аяк басты.

- Шөкер, бар да тыныч узды, - ди район мәгариф идарәсе начальнигы урынбасары Неля Гыйззәтуллина. – Бар да планлаштырылганча булды: иртәнге якта аттестатлар тараттык, кичке якта кафеларда чыгарылыш кичәләре узды, ә аннан традицион табигать кочагында таң каршы алу.

Шәһәрнең 2нче урта мәктәбен тәмамлаучы 43 чыгарылышның 3се мәктәпне бик яхшы билгеләренә тәмамлаган.  

- Быелгы чыгарылыш  заманча, креатив яшьләр булулары белән истә калды, - ди мәктәп директорының тәрбия эшләре буенча урынбасары Гүзәлия Бурлакова. – Замана яшьләренең уйлары, фикерләре дә башкача. Аннан быелгы чыгарылышлар арасында спортчылар бик күп, барысы да актив тормыш рәвеше алып баручылар. Чыгарылышларның күбесе техник юнәлешне сайладылар,  физика буенча БДИ тапшырдылар. Моннан тыш, гуманитар юнәлешләрне сайлаучылар да аз булмады. 

Мәктәпнең чыгарылышлары  кеше гомерендәге иң кадерле бәйрәмнәренең берсен бары матур мизгелләр белән генә истә калдырганнар.

- Шәһәрдә иң яхшылардан саналган “Яшьлек” кафесында бәйрәм иттек, - ди чыгарылыш сыйныф укучысы Альбина Хәммәтвәлиева. – Тамада, конкурслар, мул өстәл һәм шәп кәеф күңелләрдә бик озак сакланачак.  Афәрин, укытучыларыбызда безнең белән бергә рәхәтләнеп күңел ачтылар. Табигатьтә таң каршы алу,  мөстәкыйллеккә аяк басу чорын да беркайчан онытасым юк.  Һәр сыйныфташым үзе теләгән вузга укырга кереп, теләкләренә ирешсен иде.

Чыгарылыш кичәләре артта калды, инде бүгеннән кичәге чыгарылышлар, бүгенге абитуриентлар  вузларның кабул итү комиссияләрен штурмлый башлады.