Нурлат Сабантуен бәйрәм итә

Бүген, 7 июнь көнне Нурлат шәһәре бәйрәм рухында яши. Халык иртәдән үк Сабантуй үтәсе ипподром мәйданына ашыкты. Андагы күңелле музыка, сәүдә рәтләре, шашлык исе халыкны үзенә тартты. Сабантуй бәйрәме кунакларны төп капка янында каршы алудан башланды.  Алар район башлыгы Равил Кузюров озатуында  икмәк-күмәч ризыклары, халык сәнәгате һәм декоратив-гамәли иҗат күргәзмәләрен карадылар. Кунаклар “Нурлатнефть” НГДУсы, “ТНГ-НурГИС”, “ТатРИТЭКнефть”, Нурлат бораулау эшләре предприятиеләренең импровизацияләнгән шәһәрчекләрендә булдылар, районда яшәүче төрле милләт авылларында булып, аларның көнкүрешләре белән таныштылар. Һәр шәһәрчек үзенең һөнәре белән таныштырса, һәр авыл үз йоласын, уен көлке, җыр-бию, сый-хөрмәтен тәкъдим итте.  Сабантуйның тантаналы өлешен район башлыгы Равил Кузюров ачты. Район кураторы, республиканың баш санитар табибы Марина Патяшина республика Президенты Рөстәм Миннехановның Мөрәҗәгатен ирештерде. Нурлатлыларны язгы кыр эшләре тәмамлану белән котлап РФ Дәүләт Думасы депутаты Фатих Сибагатуллин үз сәламнәрен җиткерде. Милли бәйрәмебезнең кунаклары, якташыбыз Тәлгать Галиуллин, чуваш, үзбәк, таҗик диаспоралары, Казан һәм Яр Чаллы шәһәрләрендәге якташлар җәмгыятьләре вәкилләре һәм башкалар үз сәламнәрен юлладылар. 

Сабантуй бит әле ул авыл уңганнарына дан җырлау форсаты да. Равил Кузюров авыл хуҗалыгы алдынгыларына ТР Авыл хуҗалыгы һәм азык-төлек министрлыгының, район башлыгының, “Бердәм Россия” партиясе җирле бүлекчәсе секретареның бүләкләрен һәм грамоталарын тапшырды. Шунда ук Равил Әфраимович Иске Чаллы авылы мәдәният йортына “Бердәм Россия” партиясе төбәк бүлекчәсе исеменнән спорт инвентаре алу өчен сертификат бүләк итте.  Хезмәтне ярату, йолаларны кадерләп саклау, кунакчыллык, шатлык уртаклашуга корылган бәйрәмдә тантаналы өлештән соң, нурлатлылар җыр-бию, традицион уеннарда һәм спорт ярышларында катнаштылар.  Бәйрәм көнне 15 мәйданчыкта спорт-күңел ачу чаралары узды, волейбол буенча район оешма-предприятиеләре арасында ярышлар үтте. Төп  сәхнәдә республика йолдызлары –ТРның атказанган артисты Рөстәм Асаев һәм якташыбыз Разия Гайнуллина,  районыбыз үзешчәннәре чыгыш ясаса, кече сәхнәдә балалар арасында “Күңелле карусель” район фестивале үтте.

Сабантуй дәвам итә. Хәзер мәйданда ат чабышлары һәм милли көрәш дәвам итә.