Нурлат районының Фома авылында модульле участок ветеринария пункты ачылды

Бүген, 28 майда, участок ветеринария пунктының тантаналы ачылу тантанасында район башлыгы Равил Кузюров, ТР Министрлар Кабинеты Баш ветеринария идарәсе начальнигының беренче урынбасары Айрат Гәрәев, идарәнең Алексеевск территориаль бүлеге начальнигы Нияз Дәүләтханов катнаштылар. 

Фома участок ветеринария пункты  республикада модульле участок ветеринария пунктлары төзү программасы буенча кыска вакыт эчендә төзелде. Районның дәүләт ветеринария берләшмәсе начальнигы Василий Лысов әйтүенчә, ул тирә-яктагы 11 авылга, “Сөләйманов Ә.И.” КФХсы һәм “Космос” ОООсына хезмәт күрсәтәчәк. Участокта 6400 баш мөгезле эре терлек, 1500 вак терлек һәм 700 баш дуңгыз исәпләнә.  Участок ветеринария пунктында өч белгеч халыкка төрле яклы хезмәт күрсәтәчәк. Алар арасыңда ясалма орлыкландыру, ветеринария препаратлары белән тәэмин итү, төрле формадагы белешмәләр бирү һәм башка төр хезмәтләр бар. 

Ачылу тантанасына кадәр кунаклар район башлыгы Равил Кузюров озатуында район дәүләт ветеринария берләшмәсендә һәм ветеринария лабораториясендә булып, биредәге эш юнәлешләре белән таныштылар. 1971нче елда төзелеп, шуннан бирле ремонт күрмәгән ветеринария лабораториясен капиталь ремонт программасына кертү турында да сөйләшү булды.