Ирек Шәрипов: Татарстанга кешеләр хезмәт итәргә килә”

“Бердәм Россия” көне кысаларында милли диаспоралар арасында да очрашу үтте. Районыбызда яшәүче төрле халыкларның  үз мәдәни традицияләрен кадерләүләре югары кунакларны каршы алганда да чагылыш тапты.  ТР Дәүләт Советы рәисе урынбасары Римма Ратникова, РФ Дәүләт Думасы депутаты Фатих Сибагатуллин, район башлыгы Равил Кузюров, ТР авыл хуҗалыгы һәм азык-төлек министрының беренче урынбасары Николай Титов һәм Татарстанның Халыклар Дуслыгы йорты директоры Ирек Шәриповны милли киемнәр кигән балалар каршы алды. Әлеге костюмнар аларның гаиләләрендә саклана, я булмаса үз куллары белән тегелгән. Ә аларның әти-әниләре очрашуда катнаштылар. Анда татар, чуваш, таҗик, үзбәк милли берләшмәләре, казаклар җәмгыте вәкилләре килгән иде. 

Мәртәбәле кунаклар бу очрашуга “Дуслык” паркына нигез салганнан соң килделәр. Әңгәмә дә шундый көр кәеф белән дәвам итте. Рима Атласовна билгеләп үткәнчә, Нурлат районы – Татарстанда “Бердәм Россия” көнен үткәрүче бишенче район. Милли-мәдәни автономияләрнең төп бурычы  -  үзара ихтирам саклау һәм арттыру. Фатих Сәүбәнович та, Ирек Илдусович та Татарстанга кешеләр хезмәт итәргә һәм эшләргә килә, дип билгеләп әлеге теманы дәвам  иттеләр. Очрашуга нәтиҗә ясап, Равил Әфраимович бүгенге көндә “Бердәм Россия”нең җәмгыятьнең проблемалы сорауларыннан читтә калмавын һәм аларны чишүдә әйдәп баручы булуына игътибарны юнәлтте.